اكلات مصريه ميه فى الميه( اكلات ستو وماما )

poty poty كتب:ازيك يا هوبا عايزاكي تلحقيني ضروري انا في مشكله كبيرة جدا ومش عارفه اعمل ايه خطيبي واهله هيجولي في العيد ومش عارفه اعمل اكل ايه ليهم ويكون جديد وخفيف وطعهمه حلو وكمان عايزة اعملهم حاجه حلوة ومش عارفه اعمل ايه انا عملتلهم كل الحاجات اللي بعرف اعملها ياريت اللي عنده افكار يقول

كل سنه وانتى طيبه يا قمر وان شاء الله مفيش مشاكل بس اولا عاوزه اقولك فى العيد مفيش اكل خفيف خالص هههههههههههه بصى انتى ممكن تعملى المكرونه البشامل الى اانا منزلاها دى خرافه ع فكره والله اعمليها انتى بس وعلى ضمانتى وقسما بالله هتلاقيهم يقولولك انتى عملاها ازاى وهياكلوا صوابعهم وراها بس اعمليها بنفس الطريقه دى مش تغيرى حاجه خالص بس طبعا تزودى المقادير ع حسب الكميه
وتعملى بقى جمبها فراخ بانيه وانا هقولك طريقه سهله جدا جدا وبسيطه مش هتاخد منك تعب وهيبقى الطعم تحفه والله وتعملى سمبوسه بتبقى جميله جدا برده ومحشى ورق العنب يا سلام بقى يبقى كده تمام اوى انا منزلاه هنا بره هتلاقيه بالصور وبطاطس بقى شيبس هو كل الى قولته ده نواشف عشان انا عن نفسى بحب فى العزومات اعمل نواشف مش طبيخ والكلام ده وهقولك علي طريقه السمبوسه وطريقه الفراخ بانيه هنزلهوملك حالا عشان تبقى كل حاجه جاهزه وبالتوفيق ان شاء الله وربنا معاكى ;)

طريقه عمل سمبوسه اللحمه

المقادير

*سمبوسة اللحم

* لفتين سمبوسه ( انا بشتريهم جاهزين من السوبر ماركت وابقوا خدوا بالكوا ان تكون السمبوسه تكون الشرايح رقيقه مش تخينه لانه بيبقى ع حسب كل نوع )

*نص كيلو لحم مفروم

* 5 بصلات كبيره مبشوره

* زيت

*فلفل اسود/ ملح/ بهارت كفته

* واحده فلفل اخضر وده حسب الرغبه

الطريقه


- نعصج اللحمه / نحمر البصل فى الزيت لحد ما يبقى لونه اصفر كده ونحط عليه اللحمه ونحط كبيتين ميه عشان تاخد وقتها فى السوى كويس ونحط التوابل بتاعتنا واما تغلى شويه نوطى عليها لحد ما تستوى ونرفعها من ع النار

طريقه لف السمبوسه




(ملحوظه ) الصور دى نقلاها للامانه عشان اوضح اكتر بس هى فعلا دى طريقه لفتى للسمبوسه بالظبط

اولا نجيب السمبوسه والحشو وطبق فيه دقيق وميه لعمل عجينه نلزق بيها طرف السمبوسه


نفردها ع طبق بالشكل ده









نتنى طرف السمبوسه على شكل مثلت بالشكل دا








نتنيها تانى على شكل مثلت تانى








ونحط الحشو







ونكمل لف السمبوسه على نفس شكل المثلث







ونلزق الطرف بالعجينه بالشكل ده






وبنحمرها فى الزيت وبتبقى بالشكل ده

وبالهنا والشفا

طريقه عمل سمبوسه الفراخ

المقادير


*فرخه مسلوقه مفتته

3* بصلات مفرومه

*فصين ثوم مفرومه

*واحده فلفل اخضر

*ملح وفلفل اسود وبهارات

3* ملاعق جبن مبشور ممكن جبنه رومى او شيدر

* زيت


الطريقه

- نحمر البصل لحد ما يبقى لونه اصفر ونحط الفلفل يدبل شويه ونحط الفراخ والتوابل ونسيبها تستوى


ونلفها بنفس طريقه لف سمبوسه اللحمه الموضحه فى الصور

طريقه عمل الفراخ البانيه


المقادير



*فرخه مخليه شرايح

*ملح /فلفل اسمر

* عدد 3 لمونات كبيره

* فنجان متوسط الحجم خل

* زيت

* دقيق

* فجيتار او بقسماط

*2 بيضه


طريقه التتبيل


- نغسل شرايح الفراخ كويس ونحط عليها دقيق ونغسلها بيه كويس ونحطها فى مصفى تتصفى كويس

- نجيب الفراخ ونحطها فى وعايه ونحط فوقها الملح والفلفل الاسمر والخل واللمون ونقلبهم كويس ونغطيهم ونسيبهم اقل وقت 4 ساعات ده لو مستعجله لكن فى العادى انا بعملها قبلها بيوم بليل وبسيبها فى التلاجه

- وبعد ما تتبل بقى نحطها فى مصفى تصفى ميتها خالص

- نكون جايبين طبق فيه دقيق وطبق فيه بيض مخفوق عليه ملح وفلفل اسمر بسيط وطبق فيه الفجيتار او البقسماط

- نجيب شرايح الفراخ نغمسها فى الدقيق وبعدين البيض وبعدين البقسماط ( لازم ال3 خطوات دول انا كنت بعملها فى بيض وبقسماط بس كانت الفراخ بتنشف من جوه ) ونكون قادحين الزيت والافضل يكون الزيت كتير فى الصاطه لحد ما يبقى لونها وردى نطلعها على ورق ماص للزيت
نقدمها بقى على سرفيس ونزينها بورق البقدونس


وبالهنا والشفا


;)

يسلم ايديكى ياقمر كل عام وانت بخير موضوع متميز ماشاء الله عليكى

zoza.zazoo كتب: انا هعمل المكرونه ويارب تتطلع حلوه رغم انى عامله رجيم بس انا هطلب منك طلب بابا نفسه ياكل كشك وماما بتعمله بطريقه واحده هو بيجيب كور كده ونفسه ياكل كشك قوليلى على كزا طريقه ليه وربنا يوفقك ياجميل

باذن الله هتعجبك اوى والله وبالتوفيق ان شاء الله وكده كده الرجيم هيتكسر فى العيد ههههههههه

طريقه الكشك بقى مش فاهمه يعنى ايه بيجيب كور ؟؟؟؟؟

ام تحتمس كتب:يسلم ايديكى ياقمر كل عام وانت بخير موضوع متميز ماشاء الله عليكى

وانتى طيبه يا قمر وعيد سعيد عليكى ان شاء الله ومرسى ع مرورك يا ام تحتمس نورتينى يا قمر ويارب تكونى متابعانا ديما ان شاء الله

فووووووووووق الروعه بجد

كل سنه وانتوا طيبيييييييين يا احلى بنات وربنا يجعله عيد سعيد عليكوا ان شاء الله وان بقى هنزلكوا اكله مهمه جدا جدا ولايقه ع المناسبه جدا جدا جدا وهى .............................. الفته اكيد كلنا بنحبها هى تقيله اه بس منستغناش عنها وبنحبها ههههههههههه

طريقه عمل الفته



المكونات لطبق واحد فته


* رغيف عيش بلدى صغير او نص رغيف كبير محمص فى الفرن مش محروق محمص بس ههههههههه

* معلقتين رز كبار

* كبشتين شوربه لحمه

* معلقه أكل سمن بلدى

* صلصه وطريقتها ( بنجيب طماطمتين ونضربهم فى الخلاط او معلقه صلصه ونجيب فصين توم مدقوقين نحمرهم ونحط فوقهم الطماطم المضروبه او الصلصه بعد تخفيفها شويه بالميه ونسيبها تتسبك)



نجيب بقى طبق التقديم


**نكسر العيش المحمص قطع متوسطه الحجم ونحطه فى الطيق وفوقها الرز وبعدين الصلصه على الوش وبعدين نرش معلقه السمنه على الوش ونحط بقى شوربه اللحمه ع حسب الرغبه يعنى الى بيحبها كتير اوى يحط والى عاوزها قليل يقللها شويه

وبالف هنا وشفا



;) ;)

كليوباترا كتب:فووووووووووق الروعه بجد

يا كوكى يارب ومرسى ع تشجيعك بجد ربنا يخليكى وكل سنه وانتى طيبه وعيد سعيد عليكى باذن الله