اكلات مصريه ميه فى الميه( اكلات ستو وماما )

ربنا يخليكي ليا بوبا يا قمر هقولك اخر مرة كان هنا انا كنت عامله ليه مكرونه بالشاميل ومحشي روق عنب وبط فاننا عايزة اعمل حاجه تاني غيرهم بفكر اعمل رز بالخلطه لاننا هنعمل فراخ مشويه وهعمل كفته وسمبوسه بالجبنه واللحمه وماما هتعمل رقاق ايه رايك يا جميل
ولو تعرفي طريقه عمل الرز اللي بالخلطه والمكسرات ياريت تقوليلي عليه

انا اسفه يا جميل نسيت اقولك كل سنه وانتي طيبه والسنه الجايه ان شاء الله تكوني في بيتك

وانتى طيبه يا قمرعيد سعيد عليكى انتى يا قمر وربنا يخليكى ع الدعوات الحلوه دى وانا اسفه اتاخرت عليكى يارب تكون العزومه لسه معادها مجاش وفعلا الاكلات الى انتى بتقولى عليها كويسه اوى وتمام كده هى كلها نواشف وانا بفضل النواشف فى العزومات والرز بالخلطه يا ستى هقولك ع طريقته الى بعمله بيها هى سهله اوى


طريقه عمل الرز بالخلطه


المقادير


* نص كيلو رز بسمتى او عادى

*شوربه لحمه

* توابل الرز بالخلطه ( ودى بنجيبها من عند العطار لاما جاهزه لاما بيعطيهالك وتطحنيها فى البيت ودى افضل طبعا بتبقى مضمونه )

*زبيب / كاجو او بندق او لوز او سنوبر

*بصله متوسطه الحجم

* زبيب

* زيت او سمنه / ملح

* كركم



الطريقه


- ننقع الزبيب فى ميه ساعه كده عشان ينفش

- نجيب البصله ونبشرها ونحمرها فى الزيت او السمنه لحد ما تدبل شويه نشوح نص كميه الزبيب الى هنجبيها مع البصل لحد ما يبقى لون البصل اصفر نحط الشوربه الكافيه لتسويه الرز على البصل ونحط عليهم خلطه الرز على حسب الرغبه لانها بتبقى حاره شويه ونحط بقى كركم ع الشوربه لحد ما يبقى لونها مناسب ونسيب الشوربه لحد ما تغلى نحط الرز ولو عاوزين نضيف قطع لحمه فى وسط الرز وهو بيستوى ممكن بس تكون اللحمه مستويه طبعا ونضيف الملح نسيبه بقى يغلى شويه ويشرب الشوربه نقلبه كويس عشان الزبيبت مش يركز فى ارضيه الحله ويتحرق بعد كده نوطى النار لحد ما يكمل سويه

- نجيب الزبيب والمكسراات اذا كان اللوز او الكاجو او البندق ونشوحهم فى سمنه بعد تكسيرها لنصين ونحطهم على ورق ماص

- بعد ما يستوى الرز نغرفه فى طبق التقديم ونرش فوقه الزبيب والمكسرات ع حسب الرغبه
وبالف هنا وشفا
;)

طريقه عمل صينيه التورلى


انا هقولكوا بقى ع اسهل طريقه لعمل التورلى باللحمه وبجد بيبقى طعمها تحفه

المقادير

نص ك لحمه

نص ك كوسه

عدد 2 جزره متوسطه الحجم

ربع ك بسله خضرا

ربع ك بطاطس

ربع ك طماطم مقطعه قطع صغيره او مضروبه فى الخلاط

ربع ك فاصوليا خضرا

3 فصوص توم كبار مدقوقين

بصله كبيره مقطعه شرايح هلاليه وندعكها مع ربعه معلقه صغيره ملح مع فلفل اسمر

سمنه او زيت / ملح /فلفل اسمر / بهارات كفته بقيمه ربع معلقه شاى بلاش نكتر



طريقه العمل

- نسلق اللحمه جيدا وننشلها من الشوربه

- بعد تقطيع الخضروات وتجهيزها نقلبها كلها مع بعضها فى حله ونحط فوقها البصل والتوم المدقوق والملح وبهارات الكفته والفلفل الاسمر والزيت او السمنه والطماطم ونحطها ع النار تغلى كويس بحيث اما تتحط فى الفرن يادوب تحمر بس وتكون مستويه كويس

- وبعد ما تغلى نحط كل المكونات فى الصينيه ونحط ع الوش اللحمه ونغرزها فى وسط الخضار وندخلها الفرن لحد ما يحمر وشها

متهيالى مفيش اسهل من كده طريقه وبجد بيبقى طعمها خرافه اما تجربوها هتصدقونى


وبالف هنا وشفا

;)

بمووووووووووووت فيها يا جامد يا هوبه يا قمر

انا بعمل التورلي بنفس الطريقة و فعلا طعمه تحفة

منورنى والله يا احلى بنات ومرسى ع مشاركتكم وتشجيعكم

طريقه عمل صينيه البطاطس بالفراخ وبجد الاكله دى بموووووووت فيها بعزها اوى

المقادير





* فرخه مقطعه اربعه

* 1 ك بطاطس مقطعه شرايح تخينه شويه عشان مش تتهرى لانها بتستوى مع الفراخ

* عدد 2 طماطم مضروبين فى الخلاط

* عدد3 بصلات مقطعين شرايح هلاليه

* ملح / فلفل اسمر / نص معلقه شاى بهارات كفته

* عدد 2 فلفل اخضر رومى / وده حسب الرغبه


طريقه العمل

هى قريبه اوى من طريقه التورلى بس الفرق الفراخ هتستوى مع الخضار

- بعد غسل الفراخ كويس وتقطيعها اربعه ندعكها بملح وفلفل اسمر والبصل نفس الطريقه نقوم جايبهم ونحطهم فى حله وعليهم البطاطس وكل المكونات ونقلبهم كويس ونحطهم ع النار لغايه ما الفراخ تدخل فى السوى ونفرغها فى صينيه وندخلهم الفرن لحد ما تكتمل سويها ويحمر وشها ونطلعها ونسيبها لحد ما تهدى ونقدمها

وبالف هنا وشفا
;)

تسلمي يا قمر وتسلم ايديكى يا رب

يا كوكى يارب منورانى والله