اكلات مصريه ميه فى الميه( اكلات ستو وماما )

مجهود فوووووق الرائع يا هوبه هنثبت الموضوع

تسلميلى يا كوكى يااااااااارب وربنا يخليكى ع التثبيت بجد انتى شجعتينى اكتر مع انى بحب الموضوع ده لانى بحب الطبخ بس انتى شجعتينى اعطى اكتر ع فكره ده اول منتدى ليا والله احبه اوى كده ده اخواتى بقوا بيقولولى المنتدى ده هياكل عقلك هههههههههههه بس انا بجد بحبه اوى وبحب اعطى فيه بحس بجد اننا كلنا اخوات وبنساعد بعض ومش بنبخل ع بعض بمعلومه مهما كانت صغيره وبثق فيه جداااااااااا دنا حتى قولت لخطيبى يجيب ليا كمبيوتر فى شقتنا باذن الله عشان خاطر المنتدى ده بالذات ومنفصلش عنه واكون متواصله ديما تسلميلى يا كووووووكى

انا هنزلكوا بقى يا بنات اكلات صوانى زى المكرونه بالشامل / الجلاش باللحمه المفرومه / الرقاق

مممممم طب اعمل معاكي ايه ياهوبة ؟
كل اللي انا كنت عايزاة لقيته
ولااااااازم اقولك على حاجة مش مكتوبة هعصر دماغي
بصي يا ستي عايزة طريقة التشيز كيك انا عارفة ان كان فيه 100 طريقة
بس انا عايزة طريقة سهلة وفي نفس الوقت اقدر اعملها تكون نتيجتها مضمونة ومتجربة قبل كدة

انا هبتدى بالمكرونه بالبشامل انا شوفت طرق كتير اوى بس انا بقى هنزلها بطريقتى والى طبعا متعلماها من ماما ووالله كل الى بيدوق المكرونه بتاعتنا بيحلف بيها ويسالنا بنعملها ازاى لانها بتكون روعه وكريمتها بتبقى خفيفه وجميله وطعمها زى طعم القشطه هقولكوا ع الطريقه دى وجربوها ومش هتندوموا


طريقة عمل المكرونه بالبشامل


المقادير



*ك1 مكرونه اقلام

* 2 ك لبن حليب

* نص ك لحمه مفرومه

* عدد 2 بصله كبار او 3 متوسطين (مبشورين )

* عدد 1 فلفل اخضر ( ده حسب الرغبه انا عن نفسى مش بحط فيها فلفل بس فى ناس مش بتتخيلها من غير الفلفل فقولت احطه فى المقادير عشان محدش يزعل هههههههههه )

* 5 معالق اكل مليانين دقيق

*عدد 4 بيضات بلدى او 3 بيض احمر

* ملح / فلفل اسمر

* زيت او سمنه

الطريقه


- نغلى اللبن ونسيبه يبرد لسببين اولا عشان هنضرب فيه البيض فلازم يكون دافى مش سخن عشان مش يستوى ويكلكع_ تانى سبب عاوزين اللبن يعمل وش قشطه عشان ناخده محتاجينه فى الاخر
;)


- نسلق المكرونه بس نخليها مش مستويه اوى تمدغ عشان متبقاش معجنه ونراعى اننا مش نشطفها من النشا اول ما توصل لدرجه السوى الى عاوزينها نحطها فى مصفى تتصفى وبس

- نعصج اللحمه/ نحمر البصل فى زيت او سمنه لحد ما يبقى اصفر نحط اللحمه عليه وطبعا الى عاوز يضيف الفلفل يضيفه بس يتقطع قطع صغيره ونحط بقى كبايه ميه عشان تستوى كويس (ومش تعمل انتفاخ ) نحط الملح وفلفل اسمر حسب الرغبه

- نيجى بقى لاهم حاجه فى الاكله دى وهى ( كريمه البشامل ) طبعا بعد ما نشيل وش اللبن القشطه فى طبق ونسيبه ع جمب نجيب نص اللبن ونحطه ع النار ونحط النص التانى فى شفشق الخلاط ونضيف عليه الدقيق والبيض وملح بلاش فلفل اسمر فى الكريمه عشان مش تغمق وهيبقى لونها من غيره ابيض وجميل ومتخافوش مش هتبقى زفره من البيض مش تقلقوا خاااااالص نضربها بقى كويس فى الخلاط هتحسوا انها شكل الكريمه بتاعه التورته
نحطه ع اللبن الى ع النار ونقلب باستمرار لحد ما تتقل وتقلبظ ههههههههه نقفل النار عليها ونسيبها تهدى دقيقتين

( طبعا هتقولوا ليه مش حمرنا الدقيق فى زيت او سمنه زى ما ااحنا عارفين هقولكوا ليه )

*اولا الدقيق بيكلكع فى الزيت وبيتعب اوى عقبال ما نظبطه ويتحمر

* ثانيا بيشرب زيت او سمنه كتير وطبعا ده مش كويس لان الاكله سمينه اوى فيها دهون بما فيه الكفايه فمش محتاجه يعنى نزودها

* ثالثا وده الاهم من الاتنين الاولانيين انها مش هتعمل حمو وحموضه الى بنحسه اما بنحمر الدقيق للبشامل فبالتالى هنمنع تعب المعده

* رابعا بقى والله والله ولو جربتوها هتحسوا الفرق فى الطعم طعمها بيبقى خراااااااافه وده عن لسان كل الى جربوها بالطريقه دى

*** نيجى بقى لبقيت الست مكرونه بالبشاميل هههههههههههه

نجيب الصينيه المناسبه ونجيب كبشتين بشامل وندهن بيها الصينيه كلها ومن جوانب الصينيه كمان عشان مش تلزق ونحط كبشتين زيهم ع المكرونه وحته لحمه مفرومه ونخلطهم كويس نقسم المكرونه لجزئين جزء هنحطه فى الصينيه من تحت ونفرش فوقه اللحمه المعصجه كويس ونقوم حاطين الجزء التانى من المكرونه ونقوم حاطين البشامل كلها مش تسيبوا اى حاجه منها انتوا ممكن تحسوا انها كتير اوى لا حطوها كلهااااااا وبعدين نجيب القشطه الى اخدناها من وش اللبن ونحطها على وش الصينيه ودى بقى هتعطى شكل للصينيه تحفه وطعم طبعا كمان وبعدين بقى نحط الصينيه فى الفرن ونخلي النار متوسطه لا عاليه ولا واطيه انا معرفش الصراحه بالدرجات لان الفرن بتاعى من العادى فانا بخلى النار متوسطه

اما يكمل سويها بقى طلعوها من النار ونسيبها اما تبرد يعنى تبقى دافيه بس مش سقعت اوى يعنى عشان نعرف نخرطها ونقدمها لانها اما بتبقى سخنه هتحسوا انها سايبه من بعضها وتفرط منكوا

وبالهنا والشفا

والى يجربها بالطريقه دى ياريت يقولنا ع النتيجه ;) ;)

ويارب تعجبكوا

candymemo كتب:مممممم طب اعمل معاكي ايه ياهوبة ؟
كل اللي انا كنت عايزاة لقيته
ولااااااازم اقولك على حاجة مش مكتوبة هعصر دماغي
بصي يا ستي عايزة طريقة التشيز كيك انا عارفة ان كان فيه 100 طريقة
بس انا عايزة طريقة سهلة وفي نفس الوقت اقدر اعملها تكون نتيجتها مضمونة ومتجربة قبل كدة

ههههههههههههههههههه مرسى ع مشاركتك يا قمر ويارب تكونى متابعه معاناا ديما ومن عنيا هشوفلك طريقه التشيز كيك ان بصراحه مش عملته قبل كده هبحثلك عليه واسال كمان ناس جربوها عشان تبقى مضمونه عشان خاطر عيونك يا قمر نورتينى

تسلمي يارب كفاية تعبك

ازيك يا هوبا عايزاكي تلحقيني ضروري انا في مشكله كبيرة جدا ومش عارفه اعمل ايه خطيبي واهله هيجولي في العيد ومش عارفه اعمل اكل ايه ليهم ويكون جديد وخفيف وطعهمه حلو وكمان عايزة اعملهم حاجه حلوة ومش عارفه اعمل ايه انا عملتلهم كل الحاجات اللي بعرف اعملها ياريت اللي عنده افكار يقول

انا هعمل المكرونه ويارب تتطلع حلوه رغم انى عامله رجيم بس انا هطلب منك طلب بابا نفسه ياكل كشك وماما بتعمله بطريقه واحده هو بيجيب كور كده ونفسه ياكل كشك قوليلى على كزا طريقه ليه وربنا يوفقك ياجميل

معلش يا قمرات والله انتوا عارفين ايام ما قبل العيد بيبقى تعب موووووووت ومكنتش فاضيه ادخل غير بسيط والله ولسه شايفه مشاركتكوا انهارده سامحونى :oops: :oops: