اكلات مصريه ميه فى الميه( اكلات ستو وماما )

طريقه عمل ورق العنب



المقادير



*نص كيلو ورق عنب

* كيلو رز ابيض مصرى

*كيلو طماطم

* عدد 2 بصله كبيره

* عدد 2 فلفل احمر رومى و عدد2 فلفل اخضر

*ربطه شبت وربطه بقدونس

*ملح وفلفل اسمر وكمون

*زيت






- نبشر البصل ونجيب حله ونحط فيها الزيت ونحمر البصل لحد ما يبقى اصفر ونكون ضاربين الطماطم والفلفل الرومى مع بعض فى الخلاط ونحطها ع البصل ونسيبها تتسبك


- نجيب ورق العنب ونشيل منها العيدان بالمقص ونغسله ونكون غليين شويه ميه نغمس فيها الورق واما بتغير لونه للاصفر شويه ننشله ونشطفه بميه بارده ونحطه فى مصفى


- نخرط االشبت والبقدونس رفيع بالسكينه ونغسلها فى مصفى ونسيبها تتصفى - نغسل الرز بعد تنضيفه ونحطه فى مصفى يتصفى

- اما تتسبك الصلصله بقى نحط الفلفل الاسمر والملح والكمون حسب الرغبه ونقلبها ونقوم حطين الرز والخضره ونقلب الخليط كله كويس


نيجى بقى للف الورق


1/نفرد الورقه بالشكل ده ونخلى الجهه اللى فيها العروق جوه ونحط قيمه معلقه شاى رز










2/ نطبقها بالشكل ده








3/ نلفها باحكام بالشكل ده











4/ وده هيبقى شكلها النهائى زى شكل لفه مكنه لف ورق العنب بالظبط













- نجيب حله ونرص فى ارضيتها طمطايه وبصله شرايح ونقوم رصين ورق العنب الملفوف ونكون حشينا الفلفل الاخضر ونحطه فى وسط ورق العنب بيعطى ريحه ونكهه تحفه للمحشى نسقى بقى الحله شوربه او ميه حسب الرغبه ومش نكترها اوى عشان مش يعجن يعنى يادوب ع نهايه المحشى بس ونحطه ع النار واول ما يغلى جامد نوطى عليه ياخد سويه براحته



ويقدم فى سرفيس سخن او بارد وبالهنا والشفى


;) ;)

ام عبادة كتب:شكرا ياحبيبة على ارسالك طريقة الكشري لي

العفو ياقمر انتى تؤمرى واى حاجه عاوزه تعرفيها ادخلى وهتلاقيها ع طول باذن الله نوريتنى

ياجااااااااااااااااااااااااااااامد يا بيبو يا جامد

ههههههههههههههههه منورانى يا ايمى ع المتابعه ;)

ايه ده بقى هو محدش عجبه المحشى ولا اييييه؟؟؟؟؟؟؟؟؟

تسلم ايديكي يا جميل على المحشي وانا كمان بحب لما ادخل الطبخ اعمل الاكل بمزاج لاني لما بيكون مودي وحش الاكل بيطلع مش حلو اوي

انا هقولك على حاجه بتخلي طعم ورق العنب تحفه اعصري ليمون كتير بتاع خمس ليمونات ولا حاجه على الشوربه وانتي بتسويه وحطي قرن فلفل اخضر بيخلي ريحته فظيعه
يارب اكون فيدتكم بحاجه

يا قمرايه ع متابعتك ده اولا ومرسى ع الاضافه انا فعلا عمرى ما حطيت لمون ع محشى ورق العنب هجربه كده باذن الله انما الفلفل انا كاتباه مع طريقه عمايله ده لازم منه لانه بيعطى نكهه تحفه يا قمرايه نورتينى والله

ربنا يخليكي يا جميل انا عارفه ان في فلفل مع الخلطه لكن انا قصدي انك تحطيه على المحشي وهو بيستوي من فوق

ههههههههههههههه ااااااه انا فهمت غلط معلش حضر هبقى اجربه كده باذن الله شكرا ليكى يا قمر ع متابعتك معايا نورتينى

هنزلكوا اكله حلوه اوى وطعمها جميل انا لسه عاملاها انهارده هى برده اكله قديييمه اوى بس روعه وممكن كتير نسيها ومش بيعملها كتير هى اكله كفته الجمبرى بالرز محمره وبصلصه الطماطم

انا هنزلكوا الطريقتين بس خليط الكفته واحد


المقادير

* 1 ك جمبرى ابيض ( بلاش الجمبرى الاحمر لانه مش بيبقى فيه العرق الى بيخلى الكفته ماسكه نفسها وبتفرط وقت السلق او اما تتعمل بالصلصه )

*1/2 ك رز ابيض

* ربطة بقدونس وربطة شبت

* معلقه دقيق كبيره

*بصله متوسطه

*7فصوص توم كبار

*ملح / فلفل اسمر / كمون/ بهارات كفته

* نص ك طماطم

الطريقه


- نقشر الجمبرى ونغسله كويس جدا وبعدين نحط عليه الدقيق ونقلبه شويه ونقوم شطفينه ونحطه فى مصفى

- نقطع البقدونس والشبت صغير ونغسلها ونسيبها تتصفى فى مصفى

- نغسل الرز ونحطه فى مصفى لحد ما ينشف ونطحنه فى مطحنه التوابل نص طحنه مش ننعمه ناخد بالنا يا بنات نص طحنه بس يعنى يادوب يتكسر

- نحط بقى الجمبرى عليه الرز المطحون والبصله مقطعه اربعه و5 فصوص توم والتوابل ( الملح والفلفل اسمر والبهارات والكمون ) ونحطهم فى مفرمه اللحمه او الكبه

- نقسم العجينه نصين نص للتحمير(ودى بنعملها اقراص)_ ونصها بالصلصه ( ودى بنعملها صوابع صغيره ومش تخينه عشان مش تكبر اوى فى الصلصه تبقى معقوله )


اولا طريقه التحمير

- بعمل خلطه كده صغيوره للتحمير مش بحطها فى الزيت ع طول

** بجيب معلقتين دقيق كبار وبعجنهم بميه لحد ما يبقوا زى عجينه الكيك كده وبحط عليهم بيضه وحبه صغيرين ملح وفلفل اسمر وحته على طرف المعلقه صلصله طماطم


** نقدح الزيت ونغمس اقراص الكفته فى خلطه التحمير ويحطها فى الزيت اما تاخد لون وردى ونطلعها على ورص ماص للزيت



ثانيا طريقه الكفته بصلصة الطماطم


** نجيب صوابع الكفته ونحمرها فى الزيت على طول لغايه ما تبقى لونها وردى ونحطها فى مصفى


** نعمل الصلصه / نحمر فصين التوم المتبقيين لحد ما يبقى لونها اصفر ونضرب الطماطم فى الخلاط ونصفيها ونحطها على التوم ونسيبها تتسبك


** نسقط صوابع الكفته المحمره فيها ونسيبها شويه لحد ما تاخد سويها ونقدمها مع طبق رز ابيض


وبالهنا والشفا


;)


يارب تعجبكوا