ساعدونى بجد تعبت من التفكير

بجد انا محتاجة لرايكم قوى وتعبت بجد من التفكير ودماغى حتنفجر انا حادخل فى الموضوع علطول انا اتقرت فاتحتى من شهرين ومشكلتى الكبيرة هى حماتى متسلطة جدا وانا صارحت خطيبى بوقولتله ان والدته بتحاول تتحكم فى شوية حاجات واكيد اتكلمت عنها بطريقة مهذبة والكويس انه اعترف بده بس المشكلة انه لما حاول مجرد انه حاول انه يدخل فى حاجة وهيه تقريبا حست انه ابتدى يتقرب منه قالتله انه لو مش عاجبك ادفع انت كل الفلوس ومش حنساعدك هوه كان محوش قرشين وهما كانوا حيساعدوه بس هوه بيقول لو اعتمد على نفسه حياخد وقت ومش عارفة هل كده فعلا والا ده هروب المشكلة ان تدخلها ده انها مش عاوزاه ينزل ينقى معايا حاجات فى الشقة وعايزه هى اللى تنزل معايا وطبعا لما انا رفضت ولما هو واجههم حصل اللى حكت لكم عليه ولان والدتى متوفيه هى كمان عاوزة تنزل معايا تنقى معايا حاجتى فانا برضه رفضت ده لانها مش بتعرض ديه بتفرض نفسها مع العلم انها مشيلانا حاجات كتير وخطيبى قالى انا عارف العيب ده بس نحاول نعدى الفترة ديه عشان يساعدوه وبعد الجواز مش حيعرفوا عننا حاجة نهائى المشكلة انى حاسه انه هوه بينفذ كلامها وخايفة انه يكون بينومنى انا لان انا خايفة لانه اعتمد على انه ينفذ كلامها علطول يستمر فى كده هو اللى ظاهرلى لغاية دلوقتى انه محترم وبيصلى وبيعرف ربنا بس انا من اللى شوفته واتخدعت فى ناس كتير خايفة يكون كل ده مظاهر المهم انا والدى قالى انه طبعا لازم يدخل  بس مستنى وقت مناسب او بمعنى اصح مستنى والد خطيبى يكلمه وبعد كده يحدد قاعدة ويفهمهم ان كل واحد ليه حقه مامته ليها حقوق تحترم وانا كمان لازم يحافظ على حقوقى فهل تتوقعوا ان والدته او الشخصية المتسلطة حترضخ بسهولة لهذه الطلبات المشروعة مع العلم انه محصلش بينى وبينها اى مواجهه لانى كنت حريصة منذ البداية على ودها وهل حرصى الزائد ده هو اللى خلاها تمد رجلها وترتاح كده مع العلم انها قبل متتقرى فتحتى كانت حتموت علينا وبتتمنى لنا الرضا نرضى وعاوزة تسرع قوى انا عارفة ان كلام بابا بالنسبة لخطيبى حيبقى مقنع لانه سبق واعترف بده بس هل حيعرف يطبق انا حاسه انى بدات اتعلق بيه بس برضه لو ضيعت حقى حقى حيضيع علطول انا خايفة افتقده مع العلم انه فاسخ خطوبة قبل كده بس هما قالوا السبب ان والدة العروسة كانت متسلطة بس الواضح العكس او ان الاتنين متسلطين فمسلكوش مع بعض ههههههههههههههههههههه اعمل ايه والله باضحك من الغلب يارب صبرنى مستنيه ارائكم ومتتاخروش عليه وربنا يجازيكم عنى خير 

نسيت اقولكم ان خطيبى وحيد على بنتين وا ن حماتى متعلمة وبتشتغل وانها كانت حتموت علينا قبل الفاتحة وحمايا اللى حسيته انه بيريحها عشان يريح دماغه بس هو بيحب ابنه قوى وبيعز بابا وبيعزنى انا كمان فهل حياخد موقف وهل هى ممكن تحن شوية وخصوصا ان اللى انا حساه ان الخطوبة الاولى هى السبب فى فركشتها وخطيبى اللى كانت جيباه واحدة قريبتى وكانت تعرف مامته ولما حكت لها قالتلى انها مكنتش تعرف انها كده وطبعافى الاول مكنتش مصدقة بس بعد كده صدقت وقالتلى ان الاحتكاك هو اللى بين كل حاجة وقالتلى ربنا يهديها وبدل بابا حيدخل يبقى هى الافضل متدخلش عشان القرار فى الاول والاخر يبقى قرارنا ففضلت عدم تدخلها تقريبا لانها حست بالذنب فسيبانا احنا نحكم على الموضوع وناخد القرار حسب رد فعلهم على كلام بابا مع العلم ان خطيبى فىه مميزات كويسة حسب برضه اللى ظاهرلى لانى من كتر ماتخدعت فى ناس كتير بقيت شوية شكاكه ساعدونى بالله عليكم تعبت من التفكير وحاسه انى حموت من التفكير

شوهد 31 مرة ومفيش رد تريحوا بيه اختكم الحزينة انا بجد زعلانه لانى تعبانه قوى ومجتاجة كلامكم يريحنى ممتاخروش عليه ومتبخلوش بردكم جزاكم الله كل الخير

ياحبيبتى ربنا يهديلك الحال اهم حاجه تبقى واثقه فى خطيبك وصلى صلاه استخاره وانتى هتسكنى معاهم ولا بره لوحدكم

الله يخليكى وشكرا لردك انا ان شاء الله حصلى صلاة استخارة انا كنت صليت واحدة قبل الفاتحة والموضوع مشى بس اكيد حصلى تانى وادعيلى بطهر الغيب لانى محتاجة دعاكم قوى لأ انا الحمد لله حسكن بارة

يعنى شوهد 69 مرة ومفيش غير رد واحد بجد انا حزينة لانى كنت محتاجلكم قوى وكنت محتاجة لنصيحتكم ورايكم

انا محبطة قوى يا بنات

انا لسه شايفاه يا حبيبتى معلشي يا روحي بصي يا حبيبه قلبي لازم تتابعي مواقفه الجايه وتصري انه ينزل معاكي وتختاروا اللي تحبوه ممكن تنزليها معاكم سوري فاهمانى منظر يعنى وبعدين لو معجبكيش ذوقها متحجزيش طبعا في ساعتها لازم تبقي نفسك طويل يا حبيبتى شويه فاهمانى وهو لو اصر علي اختيارها جوه بيتك لا طبعا فاهمانى سيبيها تنزل معاكم فى العفش وتفرح وطبعا لو ليكي اخت او خاله يا حبيبتى خديها فاهمانى وفي الاخر مشي رايك بس اعملي ليها قيمه منظر وبعد كده اختاري حجتك قولي ليها يا طنط الحمد لله مش ناقصنى حاجه ولو احتجت حاجه اول واحده طبعا هقولها كوليه بالكلام ونفذى اللي في دماغكوشوفى بقي رد فعله خليكي لطيفه بس اوعي تتنازلي وانا هتابع المشكله معاكي بس ياريت تتابعينا باللي هيحصل وكمان باباكي لازم ينوه منن الاول بطريقه لطيفه لباباه كمان احسن حاجه من غير متكون موجوده فاهمانى علشان الراجل ياخد موقف ولو مقدروش عليها هما الاتنن يبقي متسلطه وهتقرفك يعنى اصبري وصلي استخراه علشان ربنا يظهرهم كمان وكمان وقولي يارب

انا لسة شيفاه موضوعك دلوقتى وانا مع راي كليوياترا بس الخوف اذا قبل هو الفكرة ونفذها معاكى هى ما تسكتش وتبوظ الدنيا وتعرف انكم كنتم بتهودوها لان انسانة بالشكل ده مش سهلة وفيه حاجة تانية ما تنسيش انه الوحيد وده فى حد ذاته مشكله انها مش هتخليه ينفصل عنها وهتفضل مسيطرة عليه والنوع ده مش بيقبل ان حد تانى يحل محلها فى حياة ابنها صلى استخارة وشوفى رد فعلهم فى الموضةع اللى اتفقنا عليه وربنا يوفقك يارب ويهديهالك

اولا انا بشكركم قوى قوى بس المشكلة انى قولتله انا مش حينفع انزل من غيرك ولما قالها كده هددته انها متساعدهوش فى التجهيز انا قولتلكم انه محوش جزء وهما حيساعدوه بجزء فلما قالتله كده حسيت انه جه عليه لما قالى حاولى انزلى معاها وارضيها لغاية منتجوز وحنبقى فى بيتنا ومش حيعرفوا عننا حاجة يعنى حنبقى مستقلين لان هو الحمد لله مرتبة كويس انا بينى وبينكم قولتله انا ايه يضمن لى ده لانى حسيت انه مقدرش يقف ادامها فانا ايه  يضمن لى بعد كده ولما حكيت لبابا قالى قوليله انك مش حتنزلى معاها وان بابا هو اللى قالى كده وبابا برضه قالى اقوله كده مستنى يشوف رد فعلهم ولما قولت لخطيبى كده قالى هو كده اريح بس انا ميرضنيش انك متنزليش قولتله يعنى انزل منظر لا انا افضلى منزلش خالص والمفروض انا فى انتظار رد فعلهم على الكلام ده المشكلة انى فى الاول كنت بحاول اراضيها وبعاملها والله بما يرضى ربنا عشان كنت عاوزة علاقتى بها تبقى كويسة فهل ده اللى خلاها تفرض نفسها قوى كده بابا قالى ان الموضوع ميمشيش كده وانه هوه مستنى يشوف رد فعلهم واكيد ليه قاعدة كبيرة معاهم عشان يحسم الموضوع ويفهمهم ان احنا مش طالبين منه يعادى والدته بس المفروض كل واحد يبقى له حياته الخاصة وده ميزعلش حد فكل اللى قالقنى دلوقتى هل شخصية زى شخصيتها ديد ممكن تتقبل الوضع ده والا لا وهل خطيبى لو الموضوع كمل وربنا اراد لنا اننا نكمل حيعرف بعد الجواز يستقل عنهم زى مقالى مع العلم والله انى مش عاوزة اعاديها والله كل اللى يتعامل معايا يشكر فيه وفى اخلاقى يعنى العيب مش من عندى بس انا حاولت افكر بالعقل لان فى الزمن ده اللى بيتنازل بيتنازل علطول فى نفس الوقت قلقانه ان الموضوع ينتهى خصوصا ان انا فى حياتى اتعرضت لصدمات كتير اكبرهم وفاة امى الله يرحمها فده بيخلينى مش قوية ومبقدرش اتحمل صدمات وفى نفس الوقت بعيدا عن حماتى خطيبى برضه كويس ويعرف ربنا حاسه انى فى دائرة مقفولة وبلف حولين نفسى رحمتك يارب