طريقتي في عمل كرات البطاطس بحشوه اللحم المفروم بالصور

الطبق دا من عمايل ايدي
وطعمه رووووووووووعه
يفضل يكون في العشا او الفطار

المقادير
2 بطاطس حجم كبير
بهارات
ملح
شطه لو تحبي
بيضه كبيره
بقسماط
لحمه مفرومه سبق طهيها ( معصجه )

الطريقه
نغسل البطاطس كويس علشان لو عليها طين
ونحطها في ماء ونسلقها
لحد ما تستوي وتطري نطفي عليها ونسيبها تبرد
ونقشرها ونهرسها اما بالهراسه اليدوي او نقطها قطع كبيره ونفرمها في المالتي كويك
لحد ما تبقي عجينه طريه
نحط عليها بهارات وملح وشطه
ولو تحبي تحطي بقدونس وخضره براحتك بس تفرميهم صغير جدااااااا
وتعجني وتدوقي لحد ما تحسي ان طعم البطاطس ظبط معاكي
تجيبي قطعه صغيره وتبططيها بحفره كدا زي ما تكوني بتشكلي طبق
وتحطي لحم مفروم بس مش كتير حبه صغيرين وتعمليهم كوره صغيره
وتغطسيها في بيضه وبعدين بقسماط وبعدين تقليهم مجرد ياخدو وش
وتطلعيهم علطول وهما لونهم دهبي
ممكن دقيقتين ويطلعو مش اكتر
لان الحشوه مطبوخه قبل كدا مش محتاجه قلي
القلي لمجرد القرمشه لا غير

صحيح متحطيش الكور في الزيت الا لما يسخن ويقدح
علشان ناخد الوش الدهبي علطول
وطبعا تقلبيها كل ما تاخد وش من ناحيه
متحطيش كتير في المقلايه علشان ميتهردش
وطلعيهم براحه علي منديل
وسيبيهم يصفو وانقليهم علي طبق التقديم وبالهنا والشفا

جربوها في فطاركم او عشاكم كنوع من التجديد
واثقه انها هتعجبكم
حصري الصوره من عمايل ايدي
لا تنسو التقييم

حلوه اوي يا رووررو تسلميلينا يا حبيبتى يارب اكتر من رائع

;)

تحففففففففففففة شطورة يا روان تسلم ايدك يا حبيبتى

;)

شكلها حلو يا روان

ان شاء الله هجربها

اوك يا روشي ابقي قوليلنا عالنتيجه

عجبتنى جدا يا روان لدرجة انى بفكر اجربها بكرة

لولللللي
طيب وجوزك قالك ايه
اوعي تقولي اكلتيها لوحدك ههههههههه

ههههههههههههههه لا

انا عملتها واكلنا منها كلنا ماما واخواتى وعجبتهم جدا جدا

وكانت خفيفة وجميلة

وعملت معاها مكرونة بالبشاميل