كفته مشويه بطريقتى

بسم الله الرحمن الرحيم
السلام عليكم ورحمه الله وبراكاته

بصوا بئا يا بنات الطريقه دى بتخلى طعم الكفته زى الكفته اللى بتشتريها من بره بالظبط وكل اللى كلها عندى بيقولى تجنن وبيفتكرونى شرياها جاهزه

المقادير

1/2 كيلو لحم مفروم
بصلتين
وملح
وفلفل اسود
وشويه شطه صغيرين
وبقسماط اهم حاجه البقسماط ده بيعمل شغل عالى يعنى ملعقتين كبار
وشويه بقدونس اخضر

الطريقه

اخلطى كل المقادير دى كويس قوى وشوفى لو محتاجه ملح ظبطى الملح بتاعك وسبيها فى الثلاجه على قد ما تقدرى ويا سلام لو عملتيها قبلها بيوم وسبتيها فى التلاجه وغطيها علشان متقلبش ريحه التلاجه
وتانى يوم هاتى اللحمه وشوفى بئا هتلفيها على ايه ممكن قلم: بلى ايدك كويس وبلى القلم بس يكون نظيف وصبعيها واحده واحده اوعى تحطيها بالقلم فى الصانيه
وتكونى دهنه الصانيه بالسمن
ومتنسيش تبلى ايدك كل مره بتعملى فيها والقلم بردو علشان تقدرى تشليها بسهوله
وبعدين تحطيها فى الفرن وسبيها 10 دقائق كده وبعدين اقلبيها وكل 5 دقائق كده ترشى عليها مايه بالبخاخه لغايه ما تستوى
وبعد ما تطلع تكونى مجهزه فحمه على النار لغايه ما تحمر وبعد ما تخرجى الكفته تجيبى اى طبق صغير وتحطى الفحمه فيه
وتكونى بردو مسيحه سمنه بالملعقه حبه صغيرين قوى وحطيها على الفحمه واقفلى بسرعه علشان الكفته تاخد الدخان كله
وطلعيها وحطيها فى الطبق وزينيها بشويه بقدونس
وبالهنى والشفا وادعولى

تسلمولى انتم
وبالهنى والشفا
ويا مرينا
بصى انتى بعد ما تطلعى الكفته وهى لسه فى الصانيه متشلهاش منها خليها زى ما هى حطى فى وسطها الطبق الصغير ده وحطى الفحمه فيه وتروحى تحطى ربع معلقه السمن اللى انتى سيحتيهم دول واقفلى على طول
وحلوه قوى يا دليا فكره مايه البصل والطمطمايه دول
معلش اتاخرت عليكى يا مرينا علشان النت كان فاصل عندى