الرز المدسوس او المعمر

انا اكتشفت ان اهل المدن فى مصر بعضهم مايعرفهوش او يعرفوه بس مايعرفوش يعملوه عشان كده قلت اجيبلكم طريقته



5 اكواب رز مصرى

6 اكواب حليب

ملح

سكر بسيط

4 معالق قشطه

100 جرام زبده وياسلام لو فلاحى



نحط كل الكلام ده على بعضه طبعا بعد مانغسل الرز ويكون فى صينيه مدوره بجدار مرتفع والافضل برام الى هو من الفخار بيكون افضل ونراعى المعيار يعنى مقدار الرز وحجم الصينيه

يدخل الفرن على نار عاليه جدا لحد مايغلى ونهدى شويه صغيره بس نحافظ على النار عاليه شويه برده لحد مايتشرب او بمصطلح اخر يختم يعنى تلاقيه عمل وش احمر وبطل يبقلل كده ويتحرك

ثم نهدى النار ونسيبه حوالى شويه او نطفى عليه النار ونسيبه فى سخونية الفرن حوالى ربع ساعه

الكلام ده لو الفرن غاز

لكن لو الفرن كهربا حيكون فى البدايه على اعلى نار عندك مثلالا 250 او 350 ثم لو نهدى شويه حوالى 220 طبعا الحراره من فوق ومن تحت
وبعد مايختم نقلل الحراره على 180 وتكون الحراره من تحت بس لعشر دقايق

وبالف هنا وشفا حتاكليه لوحده كده من طعامته

عايزه اعرف بقى كام واحده هنا ماكنتش بتعرف تعمله

ههههههههههههههههه انا بصراجه مكنتش اعرف وكمان محاولتش لاني سمعت انه صعب بس ربنا يكرمك يا فطومه بجد حسيته سهل من وصفك ربنا يبارك لك يا حبيبتى

ده سهل جدا جربى تعمليه وان شاء الله مش حتبطليه احناعندنا هنا ده اساسى ومافيش حد مابيعرفش يعمله جربيه بس
وهو محتاج شوية مران على ماتظبطى معيار الرز بتاعك وهكذا
وبالف هنا وشفا

هههههههههههه انا كمان مش بعرف اعملة

بس بحبة وجربت اعملة مرتين مرة مش ضبط معايا

ومرة كان كويس شوية وطعمة حلو

بس فى كل مرة اللبن بيفور مش عارفة لية

هو عادى ان اللبن يفور وينزل من على الاطراف
ده الطبيعى بتاعه
بس انتى حاولى تقللى مقدار الرزالى بتعمليه شويه عشان اللبن لما يغلى يفضل فى الصينيه ماينزلش
او كبرى الصينيه الى بتعمليه فيها

انا ان شاء الله مره حصورهولكم بخطواته كامله وهو فى الفرن

شكرا لكى حبيبتى انا بعمل الارز المعمر دائما و بيطلع ناجح و لكن انا بضع السمن او الزبد فى الاخر بعد ما يرتفع الارز و بغطيه بغطاء

هى فعلا الطرق تختلف بس الاهم انه يطلع حلو
شكرا ليكى حبيبتى
مشاركه قيمه

انا اول مرة اسمع بيه انا بعمل الرز بلبن عادى فى البوتجاز
لكن دا شكله لذيذ
حاجربه انشالله

الرز بلبن الى على البوتجاز ده عندنا بنعمله كصنف حلو

لكن ده للغدا مع اللحمه والخضار

جربيه ان شاء الله يعجبك وبالف هنا وشفا ياقمر

انا بكله حالا بالصدفه لقيت الموضوع قلت ادخل ادوقكم حته ههههههههههه