خلاص هفك الخطوبه

ازيكم يا اميرات
مكنتش احب في يوم من الايام اني ابقي اميره حائره
بل كنت بحب اكون انا اللي بساعد
علشان كدا انا عملت القسم دا

المهم انا خلاص فكرت كتير وقررت اني هفك خطوبتي
لان بعد ما قولتيلكم عالمشكله اللي خطيبي حصلت بينا
قالي هديكي فرصه اخيره تثبتيلي ثقتي فيكي
قولتله اوك
ومفيش في اليوم اللي بعده علطول سحب من الفرصه
بانه عمل مشكله علي كلام حصل بيني وبين زميلتي
انتي ازاي تقولي لزميلتك ان حماتك قالت عليكي
انك كبيره علي ابني
قلتله اولا صاحبتي دي متعرفش مامتك اصلا
قعد يقلي انتي كدابه وكمان بتعملي حاجات من ورايا
وبتجيبي سيرتي ويا عالم بتقول عليا ايه تاني
هو انا ايه يا اميرات مش من حقي افضفض

وكل ما اخرج من حاجه يطلعلي بمشكله جديده
والوقتي بتصل بيه اطمن عليه اتاخر بره ليه
لقيت حد كنسل عليا
اتصلت بعدها بنص ساعه
لقيت مين بيرد عليا
خطيب اختي القديم وبيقلي دا كان محول موبيله علي رقمي علشان موبيله فصل شحن
طيب انا زنبي ايه الوقتي
مسكني زعقلي وقالي هو بدل كنسل بتتصلي ليه
قلتله فكرت جنبك دوشه ومردتش قلت اجرب عادي زي كل مره مش جديده اعملها

وعمال يمسكلي عالواحده ويقلي مش بحب كلمه ايوه دي
قلتله هقول ايه يعني
ومتقوليش كذا فلاحي اوي علفكره

دا هيعلمني اتكلم ازاي
نسي باين انا بتكلم ازاي ومتربيه ازاي
والله دا هو بيقول كلام كتير غريب ومبعلقش
ويقعد يحرجني كدا علطول واعيط

سيبوني افضفض اصل دي النهايه ومعدتش هصدعكم تاني
وكمان بقا بيكلمني باسلوب ولا الشحاته
امه قوته عليا

انا قرفت بجد
وهو دا حلي النهائي
ولا انتم رايكم ايه
انا ممكن يكون كلامي مش مترتب لاني متعصبه شويه

السلام عليكم و رحمه الله وبركاته
هاي روان ... انا عضوه هنا في المنتدى من زمان بس للاسف مكنتش بقدر ادخل كتير ولا كان ليا نشاط فعلي لاسباب كتير ... المهم انا كنت شفت موضعك الاول بس بصراحه أحرجت ارد عليكي لانك متعرفنيش بس كنت معاكي على طول وكنت بقره كل الكلام الي بيكتبهولك الاميرات وبصراحه انا كنت مولعه من الحكايه لاني بصراحه مشيفاكي غلطي بجد يمكن صحيح انتي غلطي لما قليله انك مرحتيش كتب الكتاب بس ده كان رد فعل طبيعي لانك كنتي خيفه من زعله بس بجد من كلامك حسستني انه شيفك ارتكبتي جنايه ولا حاجه وده بيت القصيده انه بيشوف كل حاجه انتي عملتيه غلط وده مينفعش ابدا لان بالمنظر ده ومن كل الي قلهولك استحاله تعرفي تكملي حياتك معاه معلش يا روان واضح انك بتحبيه جدا و عشان كده انتي بتفكري بقلبك بس و مينفعش يعني مثلا ازاي تقدرو تتعيشو باقي حيتكوا و هو على طول بيكدبك و مش واثق فيكي الثقه ده اهم حاجه .... ونتى غلطانه يا روان من الاول ان لما كان بيكدب عليكي بتعديهاله و لونتي كدبتي عليه ولو كدبه صغيره بعدي تعتذريله انتي كده أوتي عليكي .... بصراحه انا من وجهت نظري انك لي بتعمليه حاليا هو عين الصح و مينفعش تسكتي علي الحجات الي انتي قلتيها دلوقتي لازم تخدي موقف بجد وتشوفي اه رد فعله لانه لو بيحبك بجد هيتمسك بيكي ويحاول يصلحك و أوعي تضعفي ..... سمحيني يا روان ان بقول كده انا حسه ان كلامي جامد في الوقت الي المفروض اكون بقلك حاجه تهديكي وتشجعك بس بجد انا اسف لان واضح من كلامك انك معلا تعبانه منه جدا عموما يا روان انتي تسهلي احسن من كده بكتير و ربنا يعوض عليكي خير ان شاء الله وانتي صلي صلاه استخاره و شوفي ربنا كتبلك و ان شاء الله هيكون خير ..... وسوري اني طولت عليكي

بصى يا حبيبتى اول حاجه انتى دلوقتى متنرفزه اوى وده واضح جدا من كلامك مش ينفع تاخدى قرار وانتى فى الحاله دى تانى حاجه بقى انتى عماله تعدى فى عيوبه وفى افعاله الغلطوتفتكرى كل الوحش اللى عمله ومش افتكرتيله اى حاجه حلوه اكيد كان فى بينكوا حاجات كتير اوى حلوه والا مكنتيش حبيتيه كده تالت حاجا حكاية ان يحصل بينكوا مشكله ويقولك هديكى فرصه ويسحبها تانى يوم دى بتحصل كتير ولسه الاسبوع اللى فات حاصله بينى وبين خطيبى فضلنا متخاصمين اسبوع وبنفكر ننفصل وكل ماحد منا يبتدى يدى للتانى فرصه التانى يقفلها بس بعد فتره ابتدينا نرجع بس لازم حد يبدا ويصبر فدى مش تلكيكه منه ولا حاجه ده بيحصل بين الناس عادى وحوار ان الحب مبقاش زى الاول ده بس مؤقت وعشان بقالكوا فترة كبيرة تعرفوا بعض فلازم يحصل شوية فتور وخصوصا لو فى مشكله اما بقى حكاية كلامك دى بقى فانا وخطيبى ع طول بنتريق ع بعض فيها لاننا من بلدين مختلفين وكلامنا مختلف بس بناخدها بضحك وهزار بس طبعا انتى بتاخديها زعل لانكوا اصلا زعلانين وانتى حاطه فى دماغك انه بطل يحبك ومامته بتعاصيه عليكى ومستسلمه للوضه ده انا رايى لو بجد بتحبيه مش تبعدى كده بسهوله ومش سهل انك تنسى عشرة حد والحاجات الحلوه اللى بينكوا خصوصا ان مفيش راجل كامل كله فى الاول بيبقى حلو اوى وبعد كده هتكتشفى فيه عيب برده فكرى كويس وشوفى العيوب والمميزات بس فكرى وانتى هاديه مش وانتى شايفه الدنيا سوده كده لان احنا البنات كده ساعة الزعل بننسى الحلو كله وع فكرة هو بيحبك اوى وبيغير عليكى اوى وبيعمل كده عشان انتى بعيده عنه لما تبقى معاه هيبقى مطمن انا خطيبى بيتخانق معايا لما اقعد ع النت وايام الامتحانات كان بيزعل لما اقوله اقفل عشان هذاكر اهدى كده يا حبيبتى وصلى صلاة استخاره واقعدى اتكلمى معاه وبلاش كلام التليفونات بيبوظ الدنيا خليه يجيلك وتتكلموا وانتوا قدام بعض صدقينى الموضوع هيختلف اوى عن التليفون وهتعرفوا ساعتها اذا كنتوا تقدروا تستغنوا عن بعض بجد ولا لا انا اسفة اوى انى طولت عليكى بس انا بجد بزعل اوى لما اتنين بيحبوا بعض يبعدوا ولانى حاسه بحالتك لانى كنت لسه فيها من كام يوم وكنت واخده القرار بس صبرت ومش قولته ودلوقتى متاكده انى لو كنت نفذته فى ساعة غضبى دى كنت هندم طول عمرى
وربنا يهديكى للصالح يا قمر ويعملك الخير

بصى يارورو انتى متاخديش قراى دلواتى واقعد فى حدود اسبوعين مترديش عليه ولا تكلميه خالص ولا تردى على اتصالاته خالص وشوفى ال هيحصل يمكن هو فى فترة ملل وزهق وحاسس انه مش بيحبك لكن يمكن لما تبعدى شوية ويحس انك هتضيعى منه يرجعلك لكن لو مرجعش يبقى ساعتها خدى القرار انك تسيبيه واتخطبى وهتحبى شوية وتنسى
بس اهم حاجة خدى فترة بعيد عنه نهائى ولا اتصالات ولا رنات ولا اى حاجة وربنا يوقك ويسعد ويختار ليكى النصيب الصالح

انا معاكى يارورو ان كل تصرفاته دى زياده قوى
بس ماينفعش تاخدى القرار وانتى متعصبه
الواحد ساعة الزهق بيشوف كل حاجه وحشه وينسى كل حاجه حلوه
استنى شويه على ماتهدى واستخارى ربنا وهو يهديكى للخير

ربنا معاكى يا رورو
كلام الميرات صحيح ما ينفع التفكير اثناء الغضب وكلام مريانا بتاع مدة الهدنة كمان طريقة حلوة عشان تتاكدى من حبه وصلاحيته ليكى وربنا يوفقك لما فيه الخير لكى

لا يا رورو يا حبيبتى اهدي وابعدي فتره علشان خاطري يا روان لازم كمان تحسسيه الاول بغلطه يمكن يتعدل ابعدي فتره واديله هدنه يا روان وشوفى انتى صغيره يا حبيبتى اوي مش قلقانيين من موضوع العرسان الاهم ان اختيارك يكون مريحك بصي الهدوووووووووء بس عرفيه انك فى فتره تقييم للعلاقه والغى متابعه الموضوع من هنا من تحت علشان ميوصلشي علي ميلك يا بنتى علشان المشاكل واهدي ياما الناس بتتشاكل بس القرار السريع غلط اهدي شويه وعرفيه انك متضايقه شويه وهتبعدي وشوفى رد فعله ايه فهمانى اصبري شويه ومش هوصيكي صلاه استخاره هي اللي هتحل المشكله اهدي ياحبيبتى علشان خاطري وكمان اصبري متاخديش قرار سريع هوه متضايقه من اللي حصل يا بنتى معلشي اصبري وتابعينا بالاخبار بس شيلي اوبشن متابعه المووضع علشان موصلشي ردنا علي الميل يا حبيبتى

اهدى يا رورو واستعيذى بالله من الشيطان الرجيم
واعملى استخارة دى مهمة جدا
واقعدى مع نفسك فكرى ان دة جوزك وحصل مابينكم المشاكل الزوجية هيحصل اية هتقدرى تتنزل وتعدى وتفوتى علشان الحياة تمشى اذا كانت اجابتك اة يبقا تهدى طالما بتحبة ومتقدريش على زعلة
واذا كانت اجابتك لا وبتخدى كل حاجة على اعصابك وقلبك قسى من نحيتة ومش حاسة انة هيكون حنين معاكى يبقا يقسى انتى على قلبك بدل ماحد يقسى علية
اللى عاوزة اوصلهولك تخيلى حياتك الزوجية علشان تعرفى دة ممكن تكملى معاة ولا لا
الخطوبة مش زى الجواز الخطوبة دبلة ومع السلامة الجواز لالالالالالالالالالا
انتى دلوقتى موقفك اقوى ميت مرة
جربة اتقلى عليةومش تتصلى خالص وشوفى لما يحس انك مش فارق معاكى هو اللى هيجرى وراكى ويعتذرلك كمان
الواحد مش بيحس بحلاوة اللى فى ايدة الا لما يضيع منة
وربنا يهديكى للزوج الصالح

بصوا يا بنات انا هعمل زي ما انتم قولتو هصلي استخاره واشوف نفسيتي مستريحه لايه واقولهلكم
وزي ما مريانا قالت هقوله نسيب بعض فتره نفكر فعلا هل هنقدر نعيش مع بعض ولا لا

انا هعمل كل اللي انتم قولتوه علشان لما اخد اي قرار مندمش عليه بعد كدا
وابقي عملت كل الاحتمالات اللي المفروض اعملها

ثالثا يا راندا انا اصلا خايفه اكتب بالعضويه بتاعتي ليشوفها
مش عالاميل بس
دا انا اكتشفت انه بيجيب الهيستوري من الاميل ويقعد يقرا
بقاله حوالي 3 سنين كدا
وانا مكنتش اعرف ان فيه خاصيه اسمها كدا
واللي يغيظني اني عمري ما دورت وراه في اي محادثات
بيقتحم خصوصيتي الوقتي ليه
هو ملوش حق يشووف اللي بقوله انا وصحابي اصلا

انا من ساعتها مش عايزاه يعرف عني اي حاجه
لانه طلع شكاك

فمعلش مقدرتش ارد علي كل واحده منفرده لان الزائر ملوش اقتباس
وفي نفس الوقت مش هقدر اكتب بعضويتي

ربنا يصلحلك الحال يا رورو
يارب