ملف شامل عن الاستعداد لرمضان باذن الله

الموضوع مجمع فى الصفحه 32






طبعا كلنا عارفين فضل رمضان عشان كده بنبقى عايزين نستغل كل دقيقه فيه على ماقد مانقدر
ولاننا ستات بيوت يعنى عندنا الكتير من المسؤليات
فالمسؤليات دى بتاخد وقت كتير وبتأثر على استمتاعنا بالعباده فى رمضان
عشان كده احنا حنعمل الموضوع ده مع بعض ان شاء الله
الاول حنعرف ازاى نرتب امورنا باذن الله عشان نكون مستعدين لرمضان من كل النواحى

من ناحية البيت وترتيبه وتنظيفه

من ناحية الاكل وتجهيزه واعتقد ان دى بتبقى اكبر مشكله بتواجه الست فى رمضان ( تجهيز الفطار ) مع بعض ان شاء الله حنعرف ازاى نجهز معظم الحاجات عندى فى الفريز واحفظها عشان تكون جاهزه على السوى علطول عشان توفر معايا وقت نقدر نستغله فى العبادات

واكيد كمان ان شاء الله حنتكلم عن العباده فى رمضان باذن الله


مستنيه اشوف ردودكم لو معايا ان شاء الله نبتدى الجزء الاول

معااااااااااااكى ياقمر طبعا ربنا يكرمك ويقويكى

ان شاء الله معاكي ...

معاكي جداااااااا وخصوصا انا لان حماتي هتيجي تقضي معايا رمضاان ادعولي

ربنا يقويكي و ييسرلك يارب

تسلمولى يارب يا اميرات
وانتى ياسهيله ربنا يقويكى وتبيضى وش جوزك قدام حماتك يارب

الجزء الاول


تنظيف البيت







طبعا احنا كل الى فاضل قدامنا شهر واحد عايزين نقسم فيه الشغل كله ونخلص كل الى ورانا
اول جزء حنتكلم عنه هو تنظيف البيت
عايزين نمسك البيت جزء وجزء ونظفه


اولا طبعا اهم جزء عايز نظافه هو المطبخ عشان يكون مستعد للشغل التقيل


حنمسك جدران المطبخ كلها ونغسلها كويس بالنسبه للسيراميك افضل طريقه لغسله وده كنت قرأته فى اكتر من موضوع هنا هو انك تغسليه بماء مضاف عليه خل وكحول وليمون بس قرأت فى موضوع اخر انك المفروض ماتضيفيش الكحول مع الخل فممكن تكتفى بخل وليمون

وكمان حنغسل الشباك والباب كويس

وكمان الشفاط فكيه وانقعى الاجزاء بتاعته الى الدهون لازقه فيها فى ميه وصابون او نفس المحلول الى استخدمتيه فى نظافة السيراميك وبعدين ادعكيه حينظف معاكى بسرعه ان شاء الله

الحنفيه والمقابض والحوض حتدعكيها كويس ولو الحوض اتسد حطى فيه بيكربونات صوديوم وصبى فوقه خل حيتسلك علطول انا كنت قرأت الطريقه دى فى موضوع هنا وجربته وفعلا ادانى نتيجه جميله

التلاجه حتفصليها وتفضيها وتطلعى الادراج والارفف كلها وتغسليها بالميه والصابون وتغسلى التلاجه من جوه وتمسحيها بميه وليمون عشان تكون ريحتها حلوه
وعشان الريحه ممكن تحطى فيها بيكربونات صوديوم او قطع من قشر ليمون وبرتقال او قطعه قماش مبلله وعليها فانيليا

التيربو حتفضيه وتنظفيه

وطبعا دواليب المظبخ من جوا ومن برا


البوتجاز حتفكى العيون وتدعكيه كويس حته حته والعيون بتاعته حتنقعيها فى ميه وليمون وخل
ممكن تفرشى عليه ورق المونيوم بيكون مخصص لكده وتغييريه كل فتره عشان تحافظى على نظافة البوتجاز

الحلل بتاعتك لازم تكون نظيفه كويس من جوا ومن برا كويس ادعكيها بالسلك مع ان اصلا الالمونيوم ده احنا المفروض نرميه ونستبدله بالاستلس لانه جزيئات الالمونيوم دى بتتفاعل مع الاكل وتترسب فى المخ وتدمر خلاياه وبتسبب الزهايمر والعياذ بالله ولو عندك طاسه اثار الزمن ظهرت عليها انا قرأت موضوع انك ممكن تحطيها على النار ساعتين لحد ماتتحرق وطبعا تفتحى الشفاط والشبابيك عشان الدخان وبعدين تدعكيها بالسلك حترجع جديده
وبراد الشاى عشان تنظفى الترسيبات الى فيه حطى فيه ميه وليمون بلاش خل عشان الريحه وسيبيه يغلى على النار وبمسحه خفيفه حينظف ان شاء الله
وقطاعة الخضار ادعكيها بليمون وسيبيها تلت ساعه قبل ماتغسليه
الليمون روعه وبينظف البقع الى موجوده فى المطبخ عموما وممكن تدعكى بيه الحنفيات كمان

وممكن تحكى فى الميه دى قرفه او قرنفل او قشر برتقال لو عايزه تدى ريحه حلوه لمطبخك وشقتك

الميكروويف حتحطى فيه اناء فيه ماء وليمون و بعد مالماء يتبخر منه حتدعكى الفرن من جوى كويس حينظف معاكى ان شاء الله

فرن الكهرباء وهو سخن جدا اول ماتقفليه حتشيلى الفيشه وتحطى فيه اناء فيه ميه وليمون وتقفليه ووبعد مايتبخر منه شويه حتفتحيه وتنظفيه كويس بس اوعى تشغليه بعدها علطول سيبيه شويه ينشف لحسن يكهربك
انا عمرى ماجربت الطريقه دى انا بستخدم البخاخات المخصصه لتنظيف الفرن والبوتجاز بس عيبها ان ريحتها نفاذه


وطبعا لازم تنشفى كويس بحته قطن نظيفه كل الحاجات الى انتى غسلتيها فوق دى من اول الجدران لحد الفرن لان دى اهم خطوه عندى كتير بينساها صحيح فى حاجات بيكون الافضل نسيبها تنشف لوحدها زى الاطباق والكوبايات
لكن كل الى فوق ده بيحتاج يتنشف بمجرد ماتغسليه وكمان الحمامات الى حندخل عليها دلوقتى

وطبعا ده كله مع الحفاظ على النظافه اليوميه الى بعد كده مش حتاخد مننا وقت ولا مجهود لان الحاجه بقت نظيفه وانتى بس حتنظفى الاوساخ البسيطه الى بتيجى عليها من الاستخدام اليومى لكن الحمد لله ماعدش فيه لادهون ولا اوساخ متراكمه






ثانيا الحمام

طبعا الحمام من الحاجات الى بتحتاج نظافه يوميه لكن طبعا انا مش حغسله كله يوميا فى حاجات بتتغسل اسبوعيا

حنغسله كله بس هو طبعا نظافته مش سعبه زى المطبخ لان مافيهوش دهون

حنغسل البانيو والقاعده الحنفيات والباب والشباك ومقابضهم وطبعا الجدران والارضيات




كمان لازم تنظفى النيش وكل الاطباق والكوبايات الى فيه عشان لو احتجتى اى حاجه منها فى عزومه تكون نظيفه وعلى مسحه خفيفه وخلاص

وكمان المراوح الى عندك فى البيت

الستاير والسجاد

كل ده لازم يكون نظيف عندى قبل رمضان عشان ما اضيعش اى وقت فى رمضان






كده الجزء ده خلص لو اى واحده عندها اى اضافه عليه ياريت تضيفها

والجزء الجاى ان شاء الله مهم جدا وحيكون طويل فحنعمله على حلقات

حنتكلم عن تخزين الاكل وطرق الحفظ وايه الى المفروض يكون موجود عندنا قبل رمضان وحنعمل قائمه لكل يوم من رمضان بالمأكولات الى ممكن نعملها بدل الحيره كل يوم فى حنعمل ايه على الفطار

ياريت يا اميرات تنورو الموضوع باضافتكم

جامد جامد يا فطومه ده موضوع المسابقه هضيفه في اللينكات بقي يارب يقويكي بجد هيبقي مفيد اوي تسلمي يارب

تسلميلى يارب ياكليوباترا

تحففففففففففففففففففففففففففففففففة يا جامد يا بطوط يا جامد ايه الشغل الجامد ده تسلم ايدك يارب حلو اوى الموضوع ربنا يعينك حبيبتى