جربتي صنية البطاطس البيضا

جربتي صنية البطاطس البيضا
ايوة بيضا مش حمرة ومفهاش بصل كمان ايه رايك خلاص خلاص متزعليش
تعالي لما اقولك تعمليها ازاي :

سيبك من اللي بترقص وركزي معايا ياأطلعك برة المطبخ ها هتركزي ولا
المهم:
1- هاتي الفرخه ونظفيها خليها زي الفل وريحتها حلوة " الدقيق والملح واللمون"
2- قطعي الفراخ 8 حتت لتعرفي ولا لا
" قطعي الاول اربع حتت صدرين وفخدين وبعدين الصدر 2 الفخد 2" ماشي عرفتي هتقطعيها ازاي
3- راحه فين خدي مش هتسلقيها نظفيها وبس وسبيها تتصفي :bball:
4- هاتي صنيه وادعكيها سمن او زيت علي حسب رغبتك بس حاجه بسيطه متبهدليش الدنيا
5- هاتي البطاطس قطعيها صوابع طخينه ازاي تعالي:
شغلي مخك عشان مش هقول غير مرة البطاطسايه تقسميها 2 بالعرض وال2 دول تقسميها 2 بالطول فهمتي حاجه وهكذا يارب تكوني معايا عالخط
6- حطي البطاطس فالصنيه ونزلي عليها الفراخ
7- حطي البهارات" ملح - فلفل- قرفه- يهار مشكل "
8- راس توم كامله قشريها فصوص سليمه مالك مش عجبك ليه وراكي ايه اجي اقشرهالك :يا سلام: ورشيها علي الصنية
9- حطي الصنية عالنار وصبي عليها كوبيتين مية لو لاقتيها محتاجه ميه زوديها
10- اعصري لمون ربع كوبايه معقول
11-لما الميه تغلي اوي نزلي العصير بتاع اللمون وهاتي زعتر وافركيه علي جميع انحاء الصنيه
وبعدين معاكي تفركيه " حطيه بين اديكي وكانك بتفعصيه بس براحه ايدك تطلع ورا وقدام"
12- تتبعيها كل شويه عشان الميه متنشفش وتظيعي الزوم وحلاوته
ولما تلاقي المياة باقت مناسبه باقت زوم حلو دخليها الفرن وسيبها حبه لحد ما تتحمر وطلعيها وبس وبالهنا والشفا
ممممممممممممممممممممممممممممممم لذيذة هههههههههههههه جوعتوني
عارفين اللي هتمشي من غير تقييم مش هزعل منها بس انا تعبت لحد ما كتبت :roll:

ايه عايزة اعترفلك بحاجة انا خايفة اجى ادخل موضوع من مواضيعك تانىاضرب بونيه ولا حاجة انا حاسة انك هتضربينا بقى الصراحة بس شكل الصينية كدة تستاهل بؤى بس ايه الشغل الجامد ده انا عايزة كمان ظبطينا بس من غير شخط ونطر مش هتبهدلينا يعنى عشان هتعلمينا ههههههههههههههههههه

هههههههههههههههه انتى سكره يا ايه بجد والصينيه البطاطس البيضه انا مجرباهه جربوها يا بنات تحفه بجد تسلمييا احلي ايه وتم التقييم طبعاااااااااااا

قيمنا يا ايه بس كنت عايزه اتعبك معايا واسألك سؤالين هو التوم ححطو فصوص كامله زى ماهو صح
والزعتر ضرورى اصل انا ماعنديش زعتر

ههههههههههههههههههههههههه خلاص سماح المرة دي معتش هشخط بس تسمعوا وتركزوا ومحدش يسرح مني ده انا بحبكم

اه الفصوص كاملة زي ماهي قشريها ووزعيها فالصنيه من غير ما تدقيها والزعتر ممكن متحطيش بس بيدي طعم وريحه حلوة للاكل يا جميل

انتي اللي سكر وعسل يا كليوباترا

تسلم ايدك ياجميل

تسلمي يا قمر

انا بعملها على طول مع بعض الاختلافات
تسلم ايدك يا قمر
كويس ان انتي فكرتيني لاني بقالي زمان معملتهاش

نورتيني يا لولا