هتطبخي اية اليوم

الموضوع دة مفيش حد مش بيعاني منه هو سؤال اطبخ اية النهاردة؟؟؟ سؤال محير كل يوم بسأله لنفسي
عايزين اميرات المنتدي كلهم ك ل وحدة تقولي هتطبخ اية النهاردة وطريقة طبخ الاكلة
عشان كلنا نستفيد ونجرب الاكلات المختلفة عشان نرتاح من السؤال ده
انا ان شاء الله هطبخ مكرونة اسباكتي بالصلصة
المقادير ؛كيلو مكرونة ,صلصة طماطم,وربع كوب زيت او سمنة حسب الرغبة,وشوية ملح وبهارات
الطريقة :تسلق المكرونة وتصفي وتشطف بالماء ,توضع الصلصة مع الزيت مع البهارات والملح علي النار لمدة دقيقة ثم توضع المكرونة
وتقلب جيدا وبالهناء والشفاء

حلوه الفكرة دى جدا
انا حعمل جمبرى كنت نزلت طريقته فى المنتدى هنا وده الموضوع

احلى جمبرى لاحلى اميرات

فكره حلوه جدا جدا

انا النهاردة مسافرة يعني هرتاح من الطبخ النهاردة

كويس يوم راحة
انا بقى حعمل كبدة و رز
طريقة الكبدة بشوح بصل مع فلفل ألوان كويس لحد مايدبل و اكون مجهزه الكبده مع البهارات مع التوم اضيفهم على البصل والفلفل واقلبهم ولما تستوى الكبده اعصر عليها ليمون
احمر الرز واغرفه فى الاطباق واحط على الوش الكبده
وبالهنا والشفا

جميلة يافاطمة تسلم ايدك
انا لسة جاية من السفر امبارح ورحت عند اختي النهاردة
بس عملتلي مكرونة بالبشامل بس اية تحفة

اناعملت انهارده كبسه
شوحت بصل وحطية عليه بهارات الكبسه وبعدين شوحت فيها اللحمه و حطيت صلصة و بعدين حطيت شوية ميه و قبل اللحمه ما تستوى بنص ساعه حطيت الرز الامريكى و زودت الميه وسبتها تستوى وكلناها بالهنا والشفا الحمد لله

فينك يا أميرة بطلتى تطبخى خالص ولا ايه شكلك خدتى على الدلع والراحه
وبعدين هو ما فيش هنا اميرات بتطبخ غيرنا

انا انهارده حعمل ان شاء الله كفتة بطاطس وطريقتها اهه كنت نزلتها قبل كده على المنتدى

كفتة البطاطس

حلو الموضوع ده اوي
بس انا ملاحظة ان المشاركات فيه قليلين اوي اوي

انا ان شاء الله حطبخ النهاردة مكرونة بالفراخ المشوية والمشروم
الطريقة :
1-سلق المكرونة اي شكل واصفيها على جنب
2-وبعدين اشوي الفراخ هي فراخ مخلية ومتبلاها من قبل كده واحطها على جنب عشان تبرد
3- وبعدين اشوح المشروم ومع بصل مقطع رفيع فى زيت زيتون
4- اقطع الفراخ شرايط عريضة شوية واحطها على المشروم والبصل وازود شوية ميه سخنة عشان يعمل صوص
5- اغطي عليهم ويعاد تسخينهم وقت التقديم
6- وفى كل طبق نحط المكرونة المسلوقة وعليها الفراخ بالمشروم والصوص

بصراحة الفكرة من اختراعي بس حلوة اوي ولذيذة

اكله جميله وسهله..مرسى ليكى