طريقة عمل المقلوبه

المقادير

رز امريكى ( رز بسمتى ) ممكن تستبدليه برز مصرى بس مش حيدى نفس الطعم لان المقلوبه ما تبقاش مقلوبه الا بالرز الامريكى
لحمه ضانى او لحمه بقرى او فراخ
باذنجان
بطاطس
ممكن قرنبيط لو عايزه
فصين ثوم و شويةصلصة طماطم

الطريقه

اول خطوه تسلقى اللحمه او الفراخ بس تتطلعيهم ناقصين سوى عشان حيكملو سواهم مع الرز والخضار
وياريت لو تضيفى فى مية السلق فصين حبهان , عودين قرنفل , حتة قرفه , ورق لورى , روز مارى حاجات من اللى تدى ريحه وطعم للشوربه
الخطوه التانيه تقطعى الباذنجان والبطاطس شرائح متوسطة السمك وتحمريها تحميره خفيفه فى الزيت عشان هى كمان لسه حتكمل سواها مع اللحمه والرز
الخطوه الثالثه تحمرى فصين الثوم وتحطى عليهم الصلصه وتسيبيها تتسبك كويس وبعدين تزوديلها الشوربه بمقدار لكل كباية رز كبايه ونص شوربه
الخطوه الرابعه تجيبى الحله ياريت تيفال ولو ما فيش تقصى ورقة زبده على قد قعر الحله وتحطيها عشان الاكله ما تلزقش وانتى بتقلبيها
وتبتدى ترصى راق بطاطس راق رز راق باذنجان رز لحمه وهكذا ممكن تضيفى اول راق شرايح طماطم و ياريت تخلى اخر راق خضار مش رز
والرز يكون نى زى ما هو ولو فراخ تقطعيها
وبعدين تزوديلهم الشوربه بعد ما تظبطيلها الملح والبهارات وتحطيها على نار عاليه شويه لحد الرز ما يتشرب لكن قبل ما ينشف يعنى وهو لسه فيه شوية شوربه تهدى النار وتسيبيه ربع ساعه وبعدين تطفى النار وتسيبيه فى سخونيته شويه عشان يكمل سوى من غير ما يلزقش
وبعدين تقلبيه فى طبق التقديم وحاولى تحافظى على شكله
ممكن تزينيه بصنوبر محمر
وتقدميه مع سلطة زبادى ( زبادى , نعناع ناشف , ثوم , زيت زيتون , ملح , خيار مبشور )

روعة بطتى هعملها لانى عمرى ماعملتها

ان شاء الله تعجبك وبألف هنا وشفا ياقمر