صينية اللحمة و الخضار بالبشاميل

31.10.16 23:49

* اولا تجهيز الخضار :
- خضار مشكل حسب الرغبة ( جزر مكعبات + كوسة شرايح سميكة + بسلة + فاصولياء خضراء + ذرة حلوة + بروكلى او قرنبيط + حلقات كرفس طبعا ده بيدى النكهة الجامدة)
- نفرم بصلة متوسطة فى الكبة ونشوحها على النار مع فصين توم مفرومين فى معلقة زبدة مع زيت لحد مايدبلوا بس
- نزل عليهم بالخضار ونتبله بفلفل وكسبرة ناشفة مطحونة ورقة لورا ونديهم تشويحة على نار عالية مع التقليب
- نضيف نصف كوب شوربة او مية ومعاها مكعب ماجى ونغطى عليهم على نار متوسطة لحد مالمية تنشف وهيكونوا نص سواء
- نزلهم فى طبق عميق ونضيفلهم جبنة مبشورة رومى وموتزريلا وبعدين نضيف اللحمة المفرومة المتعصجة ونقلب كله كويس..
* ثانيا تجهيز طبقة البطاطس البيوريه :
- 2حبة بطاطس تقشر وتقطع وتسلق فى ماء بملح وبعدين تهرس وهى ساخنة مع اضافة معلقة زبدة و2 جبنة كيرى ومعلقة حليب ورشة فلفل اسود خفيفة وجنزبيل بودر وكسبرة ناشفة مطحونة..

* ثالثا تجهيز البشاميل :
انا عن نفسى بستعمل بشاميل كنور الجاهز وبحطله كيرى ورومى مبشور ومعلقة مايونيز ومعلقة زبدة بيبقى حلو جدا ..

بس دى طريقة البشاميل للى يحب يعرفه
معلقتين دقيق يتحمروا فى معلقتين زبدة بس يكون لونهم فاتح مايغمقوش ونزل عليهم بكوبايتين شوربة ونقلب كويس بمضرب سلك وبعدين كوبايتين لبن ونقلب كويس لحد مانوصل للسمك المطلوب ويفضل ميكونش تقيل فى الصينية دى يكون وسط وبعدين نضيف كيرى وموتزريلا مبشورة ومايونيز وملح وفلفل
ناخد نصف كمية البشاميل ونخلطها مع الخضار باللحمة المفرومة ونسيب النص التانى للوش ..

** اخيرا رص الصينية:
طبقة البطاطس البيوريه فى القاع ( ودى اختيارى على فكرة فى ناس بتعمل الصينية من غيرها بس انا بحبها جدا بتكون جميلة وكمان بتساعد فى تقطيع القطع وبتخليها متماسكة )
وبعدين عليها خلطة الخضار باللحمة المفرومة والبشاميل
وبعدين باقى البشاميل على الوش ورشى شيدر او موتزريلا مبشور بلاش رومى عشان الحدق بقى

وتدخل فرن حامى على الرف الاوسط لحد ماتحمر جوانبها بعدين نزلها على ارضية الفرن ونولع الشواية عشان تستوى من فوق والوش يتحمر
ونطلعها ونستنى عليها اما تهدا شوية عشان نعرف نقطعها قطع حلوة وماسكة نفسها