النجرسكو بالفراخ والباشميل

** كيس مكرونة اسباجيتى مسلوقة فى مية وملح وزيت وتصفى وتشطف بالماء البارد
** البشاميل كما سبق ذكره فى الصوانى اللى فات وانا بستعمل الجاهز وبضيف عليه الحاجات اللى قلتها
** الحشو هو المختلف :
2 صدور فراخ كاملة تقطع مكعبات طولية مش تخينة وتغسل جيدا وتبل برشة خفيفة من الفلفل والبابريكا وبهارات الفراخ
-- فى طاسة عميقة نسخن 3 ملاعق كبار زبدة مع زيت ونشوح بصلة مفرومة ثم عليها فصين ثوم مفرومين ثم نزل بالفراخ ونقلبها كويس اوى لحد مالونها يبقى ابيض متحمر شوية وبعدين نزل بكمية من البسلة المجمدة تقريبا نص كوب او اقل ونقلب كويس وبعدين جزراية كبيرة مبشورة وذرة حلوة مجمدة مقدار نص كوب تقريبا برضه ونتبل الخليط كله بملح وفلفل وكسبرة ناشفة مطحونة وبابريكا وبهارات فراخ وزعتر ناشف ورقة لورا ومعلقة ورشستر صوص ولو مفيش عادى ونقلب كويس اوى عشان الخليط يتبل كويس وبعدين نضيف نصف كوب ماء ونسيبها تستوى نص سوا لحد مالمية تنشف خالص وبكده تكون جاهزة ,,
** نرص الصينية : يتفرد طبقة خفيفة من البشاميل فى قاع الصينية و تقلب حشوة الفراخ مع المكرونة كلها والبشاميل كله برضه يعنى كله مع بعضه وتنزل فى الصينية طبعا بتكون صينية كبيرة بس مش اوى يعنى مقاس 30 مثلا وتوزع الجبنة المبشورة على الوش مع توزيع معلقة سمنة صغيرة على الوش وتدخل فرن مسخن على 210 تقريبا لحد ماجوانبها تحمر والوش يبدأ يحمر بعدين نزلها على ارضية الفرن ونولع الشواية من فوق عشان تستوى من فوق كويس وشها يتحمر ,, وعلى فكرة هى مابتبقاش متغطية بالبشاميل زى المكرونة بالبشاميل لا بتبقى المكرونة باينة فيها على الوش بس بتبقى تحفة