لو نازلة تصلى التراويح خدى معاكى دول

لو نازلة تصلى التراويح خدى معاكى دول




كل سنة وانتوا طيبين




وأحنا رايحين للتراويح بنحتاج شوية حاجات ناخدها معانا وحاجات نعملها قبل ما نروح علشان نقدر نستمتع بالصلاة ونركز فيها بقدر الامكان


بس قبل ما نقولها لازم نركز على حاجة مهمة

ان صلاة المراة فى بيتها افضل واعظم اجرا من صلاتها فى مسجد الرسول نفسه ف ما بالك لو مسجد عادى

في حديث أم حميد أنها قالت للنبي صلى الله عليه وسلم: إني أحب الصلاة معك. قال: قد علمت أنك تحبين الصلاة معي، وصلاتك في بيتك خير لك من صلاتك في حجرتك، وصلاتك في حجرتك خير من صلاتك في دارك، وصلاتك في دارك خير لك من صلاتك في مسجد قومك، وصلاتك في مسجد قومك خير من صلاتك في مسجدي. رواه أحمد وحسنه الأرناؤوط والألباني


ف الاحسن والافضل تصلى فى البيت بس لو نزلتى مرة ولا اتنين
خدي معاكي:
1- ملابس مريحة: قطنية لو أمكن علشان الحر .. ممكن عباية واسعة و أيشارب كبير قطن علشان الحر

2- كوباية بلاستيك


3- شنطة صغيرة بتتعلق على الكتف .. علشان ما تبقيش قلقانة وأنت بتصلي على الشنطة وكمان الشنط الكبيرة بتلخم وما بنعرفش نحطها فين


4- مناديل علشان لو ربنا أكرمنا وبكينا في الصلاة أو الدعاء


5- لو عايزة ثواب أكسترا هاتي معاكِ أزازة ماية ساقعة واسقي الناس أثناء فترة الدرس .. وما تنسيش شوية كوبايات بلاستيك.
(أفضل الصدقة سقي الماء)


6- وقبل كل شيء قلب خاضع خاشع مشتاق .. نسأل الله أن يرزقنا أياه.

* سيبي في البيت:

1- البرفان والميك آب :

لا تمنعوا إماء الله مساجد الله ، وليخرجن تفلات) .. تفلات :معناه: غير متعطرات ولا متزينات



2- رنة الموبايل ... صامت الله يكرمك


* قبل ما تروحي:

1- مش تتقلي في الأكل ساعة الفطار علشان ما يكيسش على نفسك وتنامي وأنت بتصلي ويمكن ما تقدريش تروحي من الأصل ... كلي نص الطبق وكملي الفطار لما ترجعي من التراويح.


2- ريحي بعد الفطار شوية 10 دقائق غمضي عينك وسيبك من التلفزيون والبرامج التافهه اللى شغالة دلوقتي


3- مري بعينك على الجزء اللي هيقرأه الإمام النهاردة في الصلاة بيخليكِ مركزة أكتر في الصلاة

4- أتأكدي أن باباكِ ومامتك مش محتاجين حاجة وأنهم راضيين عنك قبل ما تنزلي .. أفتكري أن التراويح سنة ورضاهم فرض ولو انتى متزوجه يبقى طبقى ده على زوجك

6- جددي نيتك وتوكلي على الله وما تنسيش دعاء الذهاب للمسجد






*وأنت في المسجد:

1- ما تنسيش تحية المسجد

2- بلاش رغي وكلام مع صاحباتك .. كأنك رايحة تزوري حد زيارة مهمة جدا جدا تسيبيه وتقعدي تتكلمي مع باقي الضيوف !!!!!!!!!

3- ما تشغليش بالك كتير بالناس التانية سواء لبسهم , شكلهم , تصرفاتهم .. ركزي على الهدف.

4- حاولي تساوي الصف وبعدين ما تشغليش بالك بالناس اللي بوظوا الصف وركزي في صلاتك.





ربنا يكرمك ويبارك فيك ويرزقنا وأياكِ الأخلاص والخشوع

يا سارة الافضل فعلا الصلاة فى البيت وفى حجرتها كمان كل سنة وانت طيبة

موضوع حلو
وى
فعلا فى ناس بتروح التراويح عشان تتكلم وتتونس مع صحباتها ولا جاراتها

كل سنة وانتى طيبة يا سارة


الافضل طبعا فى البيت انا كنت بنزل اصلى بس بحس انى باخد ذنوب مش حسنات من تصرفات بعض المصلين فبقيت اصلى فى البيت وربنا يتقبل ان شار الله

الله يبارك فيكي يا ساره يارب ويكون الشهر الكريم خير علينا جميعا ويرزقنا المغفره والعتق من النار

mervat ebrahim mohamed كتب: يا سارة الافضل فعلا الصلاة فى البيت وفى حجرتها كمان كل سنة وانت طيبة

وانتى طيبه يافيتا ويارب تفرحى بعيالك

قريب ان شاء الله

ام انتصار كتب:موضوع حلو
وى
فعلا فى ناس بتروح التراويح عشان تتكلم وتتونس مع صحباتها ولا جاراتها

اه فعلا انا كنت بضايق من الحريم دى وببقى عايزه اتخانق معاهم

oshi410 كتب:كل سنة وانتى طيبة يا سارة


الافضل طبعا فى البيت انا كنت بنزل اصلى بس بحس انى باخد ذنوب مش حسنات من تصرفات بعض المصلين فبقيت اصلى فى البيت وربنا يتقبل ان شار الله

وانتى طيبه يااوشه ياحببتى

وانا كمان كنت بعمل كده بس الناس والعيال الى بيجبوهم معاهم يغظو بصراحه ههههههههههههه

كليوباترا كتب:الله يبارك فيكي يا ساره يارب ويكون الشهر الكريم خير علينا جميعا ويرزقنا المغفره والعتق من النار

امـــــــــــــــين يـارب ياكوكى

موضوع جميل جدا
تسلم ايدك يارب
وكل سنه وانتم طيبين