السر فى احلى مكرونه بالبشاميل ممكن تاكليها

ماعتقدش ان فى حد مابيحبش المكرونه بالبشاميل
انا انهارده جبتلكم احلى طريقه ليها الى جامعه كل الاسرار الى تخليها روعه ولا تقاوم

اولا البشاميل
وطبعا ده اهم مافى الموضوع والسر فى الطعم كله فيها
حتحمرى الدقيق حاجه بسيطه جدا فى زيت وزبده وبعدين تضيفى الحليب كوب حليب لكل معلقة كبيره دقيق وتقلبى لحد ماتتقل
طبعا كلنا عارفين الخطوات دى
لكن الاهم هو اننا حنضيف مكعب مرقة ماجى وشوية جبنه بارميجان او جبنه رومى مبشوره ونسيبهم يدوبو فى السخونيه وطبعا مش حنضيف ملح لان الماجى والجبنه بيظبطو الملح

ثانيا اللحمه
وانتى بتعصجيها اوعى تحمرى البصله جامد يادوبك تقلبيها حاجه بسيطه جدا مع الزيت وبعدين تضيفى البهارات ثم اللحمه
وماتنسيش تظبطى الملح


ثالثا المكرونه
ظبطى الملح بتاعها فى الميه وماتسيبيهاش لحد ماتتهرى


حتجيبى الصينيه وتضيفى مقدار المكرونه المسلوقه كلها وعليها اللحمه وعليها نص مقدار البشاميل الى عملتيه وبعدين تقلبيهم كلهم مع بعض كويس المكرونه واللحمه والشاميل
وبعدين على الوش تضيفى النص الباقى من البشاميل وتضيفى عليه جبنه شرايح لو عندك بتكون روعه ولو ماعندكيش تضيفى جبنه بارميجان او جبنه رومى مبشوره

وتدخليها الفرن تتحمر وماتسيبيهاش كتير قوى يادوبك الوش يتحمى

وبالهنا والشفا

وماتنسوش التقييم لو عجبتكم

اممممممم تسلم ايديكى يا فطومة
وجارى التقييم

تسلميلى يارب يا ام انتصار ياقمر

تسلم ايدكي اقمر انا بعملها كده وساعات بحط انواع جبن تانيه بتديها طعم جميل بس الجبنه الرومى اطعم طبعا

انا بحبها اوى وهجرب اللى قولتيه يافطومة اصل انا مدمنه مكرونة بشاميل
جارى التقيييييييييم

على فكره انا بموت فيها بس للسف مش بعرف اعملها صعبه اوى

نفرتيتى نورتى الموضوع بطلتك ياقمر

رونا اكيد لما بتحطى اكتر من نوع تبقى اطعم وتسلميلى ياقمر

ماريانا بالف هنا وشفا حبيبة قلبى

بالعكس يابوسى ده سهله جدا جدا
طيب جربى تعمليها زى مانا بقول كده وقوليلى ايه المشكله الى بتخليكى تقولى انها صعبه

اوك يا قمر هحاول انشاء الله