ازاي تعرفي الحنه الكويسه من المغشوشه وازاي تعمليها صح

ازيكم يا احلي أميرات

انا بعرف طبعا فى ناس كتير هنا بستخدموا الحناء
المهم ملاحظتي في ناس كتير متلخبطة فى طريقتها
و مدة التخمير و حبيت اريحكوا من الحيرة فى الموضوع

في الاول بقولكم 3 نصائح
تعرفى فيها الحناء كويسه أو لا

1- لازم يكون لونها اخضر
( لما يكون لونها بني اعرفي انها 100% مغشوشة )
دي صوره للحنه الكويسه يا بنات شايفين لونها اخضر ازاي



2- ريحتها قويه جدا
( لو قربتى منها تعطسي )

3- خالية من الشوائب

دي مواصفات الحنة المثالية
علشان لما تشتريها محدش يضحك عليكي ويغشك


تاني حاجه بقا الحنة لها طريقتين :
*طريقة بتعطيكي لون اكتر
*طريقة بتعطيكي تغذية اكتر


الطريقة الاولى اللي بتعطيكي لون اكتر:


عادى تحطى حنة واللون اللي هتديه لشعرك زي
شوفي بتستخدمي مثلا كردكديه ولا كركم ولا بودره دم الغزال سواء لشعر احمر او بني اللي انتي عايزه
دا اللي انا اقصده
تحطى نصها على الحنة وهي لسه بودره ناشفه يعني زي الصوره كدا



و النص التانى تحطيه فى مايه سخنه
من ربع ساعة الي نصف ساعه حسب درجه اللون المرغوبه
وبعدين حطي المايه علي الحنه
بس و لازم على فكرة تكون الحنه سخنه
بتطلع بخار يعني
وعلشان تعملي كدا لازم تبقي غاليه المايه السخنه كويس قبل ما تحطي الاعشاب
ملحوظة :
الاعشاب لازم تتحط فى مايه سخنه جاهزة
مش تتغلى على النار
والطريقة دي مش بتحتاج للتخمير
يعنى مجرد ما بتحطى كل حاجه وتعجنيها بتستخدميها على طول
و هى سخنه
كمان ممكن تحطى ليمون او خل تفاح
حاجة بسيطة عشان يثبت اللون متكتريش الليمون لو شعرك جاف


الطريقه التانيه اللي بتعطيكي تغذيه اكتر :


وهي انك بتجيبى حنة و بتعجنيها بالبيض بس
يعنى متحطيش فيها ولا نقطة ميه
وكل ما تحسي انها جامده بتزودي البيض
بتحطى بيض يعني لو شعرك لأول ضهرك حطي 14 بيضه
يعنى كلها بتتعجن ببيض بدل المايه

وبعد كدا بتحطي عليها زبادى و قشطة و عسل و زبدة
كل الحاجات للتغذية القويه للشعر مش لإعطاء لون
بعد كدا بتحطيها في طاجن فخار
من بتاع ام علي لو تعرفيه او الرز باللبن
أي نوع فخار عندكو تحطى عليها الورق الشفاف بتاع تغطية الاكل
و تفتحى الفرن وتولعيه
و تستنى ربع او نصف ساعة لغاية لما تبقي سخنه اوي وتطفي النار
وتسيبي الحنة جواه لغاية الصبح تتخمر
يعنى من بليل لحد الصبح و بعد كدا تستخدميها

بس يا حلوين

و فى كلا الحالتين بتغسلى شعرك اول مرة بايه وبلسم فقط
واليوم الذي بعده بشامبو
و المدة خمس ساعات لو من غير بخار ( مش سيشوار)
و ساعة لو بالبخار

وفي النهايه نصيحتي استخدمي فرشاه لتوزيع الحناء على الشعر عشان تغطي الحناء الشعر كله

وأتمنى الفائده للجميع
لو عجبكم متنسوش تقيمموه

حلوه اوى يا رورو موضوع مهم جدا فعلا اشتريت حنه ملهاش اي لازمه فعلا تسلمي يا قمر

يسلمو مرورك يا حبيبتي

تسلم ايديكى يارورو موضوع روعة عشان انا كان نفسى استخدم الحنه

موضوع رائع تسلم ايدك

mariana.ibram كتب:تسلم ايديكى يارورو موضوع روعة عشان انا كان نفسى استخدم الحنه

يسلمو مرورك

فاطمة الزهراء كتب:موضوع رائع تسلم ايدك

يسلمو مرورك

انا بستعمل حنة يمني من السعودية حلوة اوي

ام يوسف كتب:انا بستعمل حنة يمني من السعودية حلوة اوي

يسلموووووووو مرورك يا الغلا