"اللى يشوف الباب وتزويقه ميشوفش نشفان ريقه "

فى مثل شعبى قديم بيقول "اللى يشوف الباب وتزويقه ميشوفش نشفان ريقه " يعنى ببساطه الاسره اللى بايناه قدامك ربنا واحده الاعلم بحالها ..هو وحده الاعلم الابواب مقفوله على ايه ..اعرف واحده ولادها أيه فى الاخلاق والادب حاجه كده خلفه تفرح وبتتحسد عليهم بجد.. بس محدش عارف انهم مرضى بمرض نادر فى المناعه وحياتهم مهدده فى كل لحظه ..الاخت اللى كذا واحده شايفه ان جوزها مفيش منه وبيتحاكوا باخلاقه ومعاملاته ومحدش يعرف ربنا مبتليها فيه بإيه والنماذج والامثله كتير .. اللى اقصد اقوله مره سمعت الشيخ الشعراوى بيقول ان كل واحد فى الدنيا واخد 24 قيراط واحد واخدهم صحه وواحد راحة بال وواحد عيال وواحد فلوس وهكذا يعنى الخلاصه كلنا زى بعض محدش واخد اكتر من حد محدش عنده احسن من التانى ربنا اداك اللى تقدر تشيله وتستحمله وبس واللى منعه عنك رفع قصاده بلاوى انت مش قدها ... متنخدعوش بالضحكه الحلوه علشان ممكن يبقى صاحبها شارب مر بس مش عايز يشيل حد همه واللى ابتلائتهم متداريه ممكن تبقى اصعب كتير من اللى ابتلائتهم ظاهره والناس مقدره وضعهم ...ارض عن وضعك واكتف بما لديك من النعم تكن اغنى الناس ..اللهم ارضنا وارض عنا
كلام عجبنى جدا وللاسف معرفشي مصدره كنت كتبته كل اللي مكتوب انه منقول بس كلام يستحق النشر
منقول