الحمص المتبل

الحمص المتبل



المكونات:
حمص منقع - كمون حوت - زيت زيتون
طحينة "شامية" – ليمون او "روح الليم مذوب في ماء"
2 فصوص ثوم + قرن فلفل اخضر + ملعقة صغير ملح

ملاحظة كل خطوة ممكن تحضرها لوحدها (الحمص بروحه + الطحينة بروحها + الثوم بروحه)هذا قبل ما تخلطهم بالترتيب .

1) اول حاجة نحطو الحمص "المنقع" في طنجرة ونعبي عليها الماء (لو ما فيش عندك حمص منقع تشري حمص عادي وبعدين تنقعه في طنجرة ماء لمدة يوم كامل 24 ساعة وبعدها تمصمصه بالماء وتعبيه في شكاير وتحط منه في الفريز كان ما تبيش تستخدمه كله )
بعد ما نخلي الحمص في الطنجرة وفوقه معبيه ماء نخليه على الناريغلي لعند ما يطيب الحمص بالكامل .
بعدين نحوله من على النار ونبدا نصفي ميه الحمص في صحن كبير "غارق" ونخلي الحمص في نفس الطنجرة – بعدين نبدا نهرس الحمص باليد متاع المهراس وحدة وحدة لعند ما كله ينهرس مضوبط .

2) ناخد الطحينة "الكمية حسب الرغبة والنكهة" لكن تقريبا ممكن نستخدم علبة متوسطة كاملة ونفرغها في صحن متوسط غارق "تلاحظ ان لون الطحينة زي القهوي الفاتح " ونعصر فوقها ليمة وحدة او ليمة ونص "لوم ما فيش عندك ليم ممكن تاخذ روح الليم وتذوبه في صحن مع الماء لحد ما يصير كانه ليم " بعد ما نضيف الليم نبد نحركها كاني ندوب في سكر تلاحظ ان الطحينة يتغير لونها وتبدا بيضاء بشكل واضح وتبدا زي العجينة شادة روحها .

بعدها نضيف الطحينة اللي حضرنها مع الليم في الطنجرة "على الحمص اللي هرسناه" ونبدا نحرك ونخلطهم باهي وقتها نقدر نزيد شويه ماء من متاع الحمص اللي خليناه في صحن بروحه حسب انت ورغبتك كان تبيها جارية والا شادة شويه وبعدها نضيف معاهم كمون حوت تقريا اقل من كاشيك كبير بشويه ونبدا نخلطهم مع بعضهم - بعدها نحط شويه زيت زيتون معاهم ونبدا نخلط .

بعدين نحضر لها النكهة .

ناخذ فصين ثوم نقشرهم ونحطهم في المهراس وفوقهم قرن فلفل اخضر "بعد ما نحول منه الزريعة" ونهرسهم باهي ونضيف عليه نص كاشيك صغير ملح "حسب الرغبة – لكن لازم شوية ملح " لحد ما يبدو يعني زي الماء .

بعدها نحط الثوم اللي هرسناه في الطنجرة ونخلطها كويس ونبدا نقسمها في الصحون .
ومكن نرش فوقها كمون حوت وزيت زيتون ..