جلاش بيتزا

هعملكم النهاردة جلاش بيتزا سريع وخفيف وحلو جدا مع انى زعلانة منكم عشان محدش جرب الشاورمة وقلى رايه ايه فيها لكن معلش خليها علية المرة دى

انطلاق ياهوانم وصفات كليوباترا


المقادير

لفة جلاش / زيتون اسود واخضر مخلى ومقطع / لانشون مقطع مربعات ضغيرة / جبنة رومى مقطعة مربعات صغيرة / معلقتين صلصة طماطم / زبدة / بيضة / كوب لبن / فلفل اخضررومى او حامى حسب رغبتك


الطريقة

هنجيب صينية مستطيلة وندهنها زبدة ونحط وحدة جلاش ونحط عليها زبدة وهكذا لحد مانكون حطينه نص لفة الجلاش ف الصينية وبينهم زبدة بعدين هنجيب الصلصة ونفردها ع اخرطبقة وبعدين نحط الزيتون واللانشون والجبنة الرومى والفلفل وبعدين نحط باقى الجلاش وبين كل طبقة والتانية زبدة ونحط ع الوش شوية زبدة محترمين كده وندخلها الفرن ولمانحس انها ابتدت تستوى نحط البيضة ف كوب لبن مع شوية فلفل اسود وذرة ملح صغيرة جدا لان الحشو كله حادق خدى بالك ونصبها ع الصينية وندخلها تانى الفرن تكمل سواها وبالهنا والشفا
ممكن تديها كمان لولادك فى المدرسة الصبح هيحبوها اوى لانها خفيفة
مستنية التجربة ورايكم فيها ايه متعملوش معايا زى الشاورمة وتطنشونى لحسن انتو حريين

ديه انا عارفاهه جامده جدااااااااااااااااااااا يا نودا بجد تحفه وبنات كتير متعرفهاش اسلم ايديكى يارب الكسل والمدارس بس لازم هعمل الاشاوما
تسلم ايديكى يا قمر

تسلم ايديكي يا نودااااااااااا

نودا بجد حلوة اوي اوي جزاك الله خيرا
انا اصلا زهقت من كل الاكل وماليش تقل اوي علي جلاش باللحمة المفرومة بس بجد
طريقتك وهمييييييييييييييييييييييييييييية وحلوة اوي
تسلم ايديكي ياجميلة

بس سؤال لوحبيت اعملها على الغدا يبقي جمبها ايه ولا شوية سلاطات وخلاص ؟؟؟

حلوة حلوة حلووووووووووووة