ساعدونى بارك الله فيكم

ورحمة الله وبركاته انا عايزة مساعدتكم يا جماعة انا متقدم لاختى عريس واحنا لقلة خبرتنا مش عارفين الاتفاقات المفروض تبقى ازاى يعنى هما يكون عليهم يجيبوا ايه واحنا نجيب ايه وياريت لو تقولولى امثلة للاتفاقات انا بتعبكم معايا بس ده من عشمى فيكم

وعليكم السلام ورحمة الله وبركاته
مبروك لاختك وربنا يتملها على خير
بصى الاتفاق ده بيبقى حسب عوايد كل منطقه

يعنى احنا مثلا عندنا العريس بيجيب الموبيليا
والعروسه بتجيب المطبخ والتنجيد والاجهزه الكهربائيه
والسجاد والستائر ساعات بيبقوا على العريس وساعات العروسه حسب امكانيات كل واحد

ى يا ام محمد عامر ويسر امرك بس انا اعرف لو العريس والعروسة من مناطق مختلفة العوايد مختلفة فالبالتالى الاتفاق بيبقى على انهى عوايد

اعتقد بتبقى تبع عوايد العروسه
وبعدين لو العريس كويس واختك مرتحاله وهو مرتحلها مش شرط العوايد اتفقوا مع بعض وشوفوا ايه الى يقدر هو يجيبوا
وطبعا الامر يرجعلكم ان كان هيعجبكم كلامه ولا لا

شكرا قوى لاهتمامك والرد ربنا يكرمك

العفو انا تحت امرك
فى اى استفسارات تانيه لو حبيتى
نورتى المنتدى

احنا الاتفاق عندنا زيك بالظبط يا ام محمد

شكرا لذوقك يا ام يوسف
ياريت اللى عنده معلومات تانية خاصة بالاتفاقات ميبخلش عليه بيها جوزيتم خيرا ان شاء الله

حبيبتى نورتينا وفعلا بيبقي حسب العادات يعنى احنا عندنا في عيلتى النص بالنص وساعات بنشيل ازيد شويه الحاجات البسيطه مش بنقف عليها في ناس بتكتب قايمه كتير وده الصح بس احنا ماما بتتكسف مش بتكتب والفرح بالنص والمفروض الفستان والكوافير علي العريس لو العفش بالنص بينصصوا كمان الستاير والنجف والسجاد او مثلا واحد يشيل النجف والتاني السجاد يعنى الحاجات الي قريبه في القيمه وطبعا البلاستكات والصينى والمفارش والملايات واللحفه يعنى الحاجات الخاصه بالفرش وهوه بيشيل الكهربائيات يارب اكون فيدتك وكل بلد غير التانيه خالص حاولي تشوفي اقررب حاجه ليكي

الله يبارك لك يا كليوباترا شكرا جزيلا ليكى
معلش انا عندى استفسار يعنى العريس من منطقة مختلفة عننا فاحنا نمشى على نظامهم ولا نظام المنطقه اللى احنا فيها