اللانشون من مطبخى لسندوتشات المدرسه

طبعا احنا كلنا متفقين ان اللحوم البارده من برا مش مضمونه خالص
وبالاخص اللانشون الواحد بيسمع قصص رهيبه عن الى بيحصل فى مصانعها
عشان كده انا عن نفسى مش بدخلها البيت خالص

طبعا هى ليها طرق كتير منها بلحمه ومنها من غير لحمه وبيكون طعمها حلو فانا بعملها بالمقادير الى من غير لحمه بس بضيف عليها لحمه عشان يكون فيها فايده اكتر للبنات لانهم بياخدوها فى المدرسه فبحب ان السندويتشات تكون مغذيه على قد ماقدر
وعلى فكره الطريه سهله جدا


المقادير دى مضاعفه ممكن تعملى النص بس

نص كيلو صدور فراخ مخليه
8 معالق دقيق
8 بيضات بس انا بضيف 5 بيضات بس
2 او 3 مكعب مرقة ماجى ( ولو مصنوعه فى البيت يكون افضل )
بودرة توم وممكن 4 فصوص توم لكن انا بضيف فصين اتنين بس و اطحنهم كويس
ملح بسيط لان الماجى بتكون فيها ملح
توابل
نص كوب زيت
ممكن لو حبيتى
شرائح زيتون
وفسدق




اولا افرم الفراخ
وبعدين اضيف باقى المقادير عليها واخلطها كويس
واعبيها فى اكواب استاليس او زجاج حرارى مدهونه زيت مع مراعاة ان الكوبايه ماتكونش ممليه
واحط على النار حله فيها ميه واحط فيها الكوبيات واسيبها على النار ساعه تستوى
انا بغطى الكوبيات عشان اقدر اغطى الحله من غير الميه الى بتتكثف على الغطا ما تنزل جو الكوبايه فبكده اضمن انها تستوى كويس
لما تستوى حتطلع من الكوبايه بسهوله ولما تبرد اغلفها واحفظها فى التلاجه

وبالهنا والشفا

الله عندك حق انا فعلا موضوع السندوتشات ده هيجننى ومش عارفه اغير كتير ربنا يكرمك يا فطوم الله مش عارفه اقولك ايه هجربه ان شاء الله

بطوطه هي بتاخد مده قد ايه في الميه
وتسلملنا ياجميييييييييييييييييييييله

كليوباترا كتب:الله عندك حق انا فعلا موضوع السندوتشات ده هيجننى ومش عارفه اغير كتير ربنا يكرمك يا فطوم الله مش عارفه اقولك ايه هجربه ان شاء الله

هى فعلا حيره وبعدين هما بيزهقو بسرعه ودايما عايزين تجديد ربنا يارب يقدرك على تربيتهم ويباركلك فيهم

Anosha كتب:بطوطه هي بتاخد مده قد ايه في الميه
وتسلملنا ياجميييييييييييييييييييييله

هى بالظبط بتاخد ساعه وتكون استوت مظبوط ياقمر

فكرة رائعة

:سلمت يداكى:

يا فطومة
فعلا كلنا بنحتار فى التغيير
انا كمان حاجربها انشالله

يارب تعجبكم ان شاء الله ياحبيبى
وشكرا لمروركم
وعلى فكره كمان لو الكوبيات مش كبيره ممكن بعد نص ساعه تكون استوت