احكاية لقطن المصرى

'القطن المصري، ذلك القطن ذو الجودة والشهرة التاريخية على مستوى العالم.

الاجانب تغنو بالقطن المصرى وكتبو فيه الاشعار

يتميز القطن المصري بأنه " طويل التيلة" كما أنه يتميز بالنعومة التي تؤهله للاستخدام في صناعة المنسوجات العالية الجودة، بخلاف الفصائل الأخرى من القطن المنتشرة في بقاع العالم التي تزرع القطن.
يتم تصدير غالبية محصول القطن المصري عالي الجودة إلى جميع أنحاء العالم، نسبة قليلة منه تستخدم في التصنيع المحلي، ذلك أن التصدير يدر دخلاً أكثر من تصنيعه.

اروع الاقطان على مستوى العالم

قام محمد علي باشا بزراعة القطن في مصر واقام علية عدة صناعات الصناعات التجهيزية: وتمثلت في صناعة آلات حلج وكبس القطن وفى مضارب الأرز ومصانع تجهيزه، وتجهيز النيلة للصباغة، ومعاصر الزيوت، ومصانع لتصنيع المواد الكيماوية. الصناعات التحويلية: وهي الصناعات المتعلقة بالغزل والنسيج بكافة أنواعه، وأقام مصانع للنسيج، وكان أول مصنع حكومي بمصر هو "مصنع الخرنفش للنسيج" وكان ذلك في عام 1816، وأيضًا أنشأ "مصنع الجوخ" الذي جلب له خبراء من بريطانيا للتأسيس وإدارة تلك الصناعة في مصر بالإضافة إلى تعليم العاملين في هذا المصنع أسرار الصنعة لتقوم عليهم بعد ذلك تلك الصناعة، وكان الغرض من إنشاء مصنع الجوخ هو توفير الكسوة العسكرية للجيش المصري


زمان مش من زمان قوى من حوالى 50 سنه بس كان الفلاح مش موظف كان بس فلاح يزرع ارضه وياكل منها وماكنش بيكون معاهم فلوس غير مرتين فى السنه
مره لما يبيعو القطن
ومره لما يبيعو الغله ( القمح )
بالفلوس دى يشترو كل الى محتاجينه كسوة الشتاء وكسوة الصيف للراجل والعيال وام العيال
الى عايز يتجوز يدفع تكاليف الجواز
هدوم المدارس للاسر الراقيه المتعلمه وفى الغالب كان للصبيان بس
فاس جديده , شكارة كزب ( اكل المواشى )

وكان القطن غالى فكان يوم جمعه ده فرح








الكل يتجمع كبير وصغير طول اليوم فى الغيط حر وبرد مش فارق لقمه كتيره قليله البركه تزيدها

كان الخير الفطره الطبيعه


دى حكايه من حكايات الزمن الجميل ده بيحكيها عمو فاروق


----{ دودة القطن بستة صاغ }----
**********************************************
سنة 1959 وأنا سنى إتناشر سنة كنت فى مدرسة المعارف الإعدادية وكنت أنا وأخويا الصغير"محمود" أصغر منى بسنتين بنحب تربية الحمام وكان ابونا يكره الموضوع ده أوى ويضربنا عايزنا ندبح الحمام وماكانش عايز يدينا فلوس عشان نشترى للحمام الحبوب ( ذرة - قمح - فول ) وكنا نقول له إحنا عايزين نربى الحمام لأننا بنحبه وممكن نصرف عليه من جيبنا فكان يضحك بسخرية ويقول لنا منين فقلنا له حاتشوف طبعا ماقدرناش نقوله إزاى لأنه لو عرف حايدبحنا مدرس لغة عربية ودين الشيخ الأزهرى ولاده يشتغلوا عمال يلموا "الدودة" ( قصدى دودة القطن كان إسمها كده عند الأولاد ) ورحت أنا ومحمود إلى "الخولى" ( رئيس العمال ) مع واد صاحبنا إسمه " مصطفى " بيشتغل عنده إلى الغيط اللى عليه الدور "بالنقاوة" وسجلت إسمى أنا ومحمود بعد المغرب وقالنا: تيجوا بكرة الساعة سابعة الصبح واللى يتأخر حاشطب إسمه ورجعنا البيت فرحانين موش عرفين ننام بنحلم بالفلوس والمفروض ننام بدرى عشان نصحى بدرى والنوم طار من عينينا وقولنا لمامتنا :صحينا بدرى ستة ونص قالتلنا : ليه رايحين فين ؟ قلنالها حانشتغل بالدودة عشان نشترى أكل للحمام قالت : دالو أبوكو عرف حايموتكوا قولنالها: معلش ياماما ماتقولولهوش والنبى وأمنا كانت حنينة أوى وخايفة علينا ومحتارة تعمل إيه بس فى الآخر وافقت وقالت : ربنا يستر ومايعرفش والساعة ستة ونص لقينا مامتنا بتصحينا روحنا غسلنا وشنا بسرعة ولبسنا الجلابية ( لأننا بنام بالبيجامة والشغل عايز تلبسله جلابية لازم ) وكان صديقنا "مصطفى " مستنينا وروحنا للغيط وبدا الخولى يوزعنا كل واحد قدام خط زراعة وقالنا : كل واحد منكوا يقلب ورق "السجرة" ( الشجرة) واللى يلاقى فيها "لطعة " يقطعها ويحطها فى "عبه " بصيت لصاحبى "أنا وأخويا محمود" وقولتله إيه "اللطعة" دية قالى هيه دودة القطن بايضة وحاطه بيضها حوالينه خيوط زى العنكبوت على الورقة من تحت عشان تحميها من الشمس ووريهالنا على" سجرة القطن " وقولتله وإيه هو " عبه " قالنا ترفع جلابيتك لغاية وسطك وتربطها ما الجنب فتعمل "عب" يعنى زى الجيب . وأى واحد منكم ينسى" لطعة" حاخرب بيته إلتفتنا لقينا الخولى هوه اللى بيتكلم وقال: كل واحد منكوا وراه واحد يفتش عليه يعمل "شيشن" اللى يلاقى وراه "لطعة" حاخصم منه نص اليومية قولنا لصديقنا : هيه اليومية كام ؟ قالنا : ستة ساغ قلت داحنا حانبقى أغنيا يامحمود فضحك من قلبه وهوه فعلا فرحان وبدأنا العمل وكل سجره أقلب ورقها مالاقيش تحتها حاجة لغاية ماقرب الخط ينتهى لاقيت " لطعة" فرحت بيها وقطعت الورقة وحطيتها بعبى ولقيت واحد ورايا بيقولى : أنت سيبت " اللطعة " دية وموش حاقول للخولى بس دى آخر مرة , قولتله :شكرا ياأخ إسمك إيه ؟
قالى : " منخر" قولتله : ساكن فين "يامنخر " قالى : فى عزبة الملك قولتله : داحنا جيران بقى فين من عزبة الملك قالى : عند برج الحمام بتاع جبران المسيحى قلتله: أنا ساكن فى بيت قدامه بالظبط الدور التانى قالى : يبقى إنت إبن الشيخ عبد الحفيظ المدرس
قولتله : أيوه قالى : إزاى أبوك وافق تشتغل الشغلانه دى قولتله: مايعرفش والنبى إوعى تقوله بعدها بقينا إصحاب ولما إنتهى خط الزرع رجعنا نبدأ خط زراعة تانى وطبعا فرغنا "اللطع " بحفرة قدام الخولى وفى الخط التالت مريت على سجرة " خيار" وكان صغير وشكل الخيار جميل قطعت خيارتين بسرعة وحطيتهم " بعبى " شافنى " منخر " قالى خد طماطم كمان عشان ناكلها بالغدا شفت سجرة " طماطم" قطعت منها أربع طماطمات صغيرة وطبعا لما لقيت "لطع" تانية حطيتها بعيدة شوية " بعبى " ناحية جنبى اليمين وفضلنا رايحين جايين لغاية الساعة إتنين "بالضهر" عرفتها من الخولى اللى نده علينا وقالنا الساعة دلوقتى إتنين راحة نص ساعة عشان الغدا وطبعا "محمود" أخويا قالى : حناكل إيه ؟ قولتله : طماطم وخيار وجبنة وعيش قالى" محمود" : منين ؟ رحت مفضى " عبى " طماطم وخيار ورحت مطلع من جيبى لفة فيها عيش وجبنة قديمة( بمش) قالى : جبتهم منين ؟ قولتله : الطماطم والخيار قالى : لأه مانا عارف شوفتك وجيبت زيك وطلع من "عبه " طماطم وخيار قدى مرتين قولتله : يانهار إسود دالو الخولى شافك حايسجنك قالى: دانا كلت قدهم كمان قولتله : يعنى شبعان آكل لوحدى بقى قالى : لأه إنت عارفنى باحب الأكل قولتله : "الجبنة القديمة الحدقة والمش" جيبتهم من "الزلعة" ( البلاصى) اللى بالسطوح قالى : والعيش ؟ قلتله كان تحت السرير مانت عارف بابا بيخبى العيش "الناشف المفقع" تحت السرير جبت رغيفين قعدت ومحمود أخويا ولقينا المفتش " منخر " وصاحبنا " مصطفى " قعدوا معانا وكلنا ويا بعض وكانت أحلى جبنة وأطعم طماطم وأشهى خيار دقته بحياتى كان ريحة الخيار لما تقطعها تشم ليها ريحة جميلة من بعيد لسة طازة مافيش كيماوى وشربنا مية من الزير اللى جنبنا بالكوز وقام الخولى قال: يالا ياولاد عالشغل وفضلنا حتى المغرب على دى الحال وقبل المغرب بربع ساعة ولعوا حطب بالحفرة حتى "اللطع" بتاعت الدودة ماكانش فيه رش مبيدات لسة كان "اللم يدوى" وحرقنا "اللطع" البيض بتاع دودة القطن ووقفنا طابور والخولى قعد على ترابيزة مهكعة وكرسى مكسور بتلات رجول وقدامه دفتر ينادى الإسم يروح يمضى وياخد فلوسه ولما نده عليا رحت مضيت إسمى وخدت الفلوس عدتها لقيتها "ستة صاغ" فرحت لأن دى أول فلوس تدخل جيبى بعرق جبينى وبالحلال ونده على "محمود أخويا " راح مضى بإسمه وخد الفلوس وهوه فرحان أكتر منى قولتله : "يامحمود" لازم نشترى درة وفول وقمح للحمام قال : حمام إيه ياعم أنا "حاحوش الفلوس" لمولد النبى عشان "المراجيح والترمس والتياترو وسيرك الحلو" عشان أشوف الأسد قولتله : دا لسه بدرى قوى عالمولد يالا هات أربع قروش منك وأربع قروش منى نشترى أكل الحمام وخلى قرشين حوشهم وخدنا التمن قروش إشترينا " قدح درة ونص قدح فول ونص قدح قمح " وروحنا للحمام بسرعة والدنيا ضلمه ومعانا لمبة جاز منورة وحطيناله الدرة والفول والقمع تصدقوا لو قولتلكوا الحمام كان فرحان أكتر مننا وكان بياكل على لمبة الجاز وفضلنا نتفرج عليه ونسينا تعبنا طول اليوم بالشمس .




لكن دلوقتى خلاص كل ده اتغير

باسم التطور والتماشى مع وضع السوق وكلام تانى فاضى كتير شوهوه زى ماشوهو كل الحاجات الحلوه الى فى حياتنا


المشكلات التي تواجه القطن المصري

تواجه صناعة القطن المصري تحديات، إذ تم بشكل تدريجي استبدال نوعية القطن المصري الطويل التيلة بأنواع أخرى أقل جودة.
بالأضافة إلى ضعف إمكانيات تصنيع المنسجات من القطن المصري والخسائر التي تواجه شركات القطاع العام التي تقوم بصناعة منسوجات القطن المصري.

القطن المصري 2010'
بلغ إجمالى ارتباطات تصدير الأقطان المصرية، من محصول موسم ٢٠٠٨/٢٠٠٩ كمية ٢٨٧١٣٠ قنطارا، بعد التعاقد على تصدير ١٢٦٢٠ قنطارا مؤخرا، بقيمة ٣٧.٧ مليون دولار.
وقال محمد الشيوى، مندوب الحكومة لدى اتحاد مصدرى الأقطان: «إن عدد الدول المتعاقدة على استيراد الأقطان المصرية ٢٠ دولة، احتلت قطر المركز الأول بنسبة ٣٨.١٢% من التعاقدات الإجمالية، تليها الصين بنسبة ١٦.٧٤٪ ثم تركيا ١٥.٩٦ %.
وأضاف: «بلغت كمية الأقطان التي تم شحنها من بداية الموسم حتى ١٨ أبريل الجارى كمية ١٢٦٠٩٠ قنطارا، بنسبة ٤٣.٩١٪ من إجمالى الارتباطات.

سعره فى 2012


سعر 1000 جنيه للقنطار فى مناطق الوجه القبلى

و1200 جنيه للقنطار “جيزة 86″

و1400 جنيه للقنطار “جيزة 88″

انا لما بتفرج علي افلام اجنبي واشوف قد ايه هما بيحبوا ويحترموا القطن المصري ببقي بجد فخوره اوي ومبسوطه

بتفكرينا باوجاعنا الله عندك حق يا فطومه ربنا يبارك لك ياربت الناس تشتري المصري علشان حاله يتعدل ويرجع زي زمان تسلم ايديكي يارب يا احلي فطومه

تسلميلى ياكليوباترا يارب
ياريت فعلا نشجع منتج بلدنا زى دول برا مابيعملو لان فعلا دلوقتى وبعد الصينى ماغزا الاسواق بقى هو المضمون

دايما مميزة بمواضيعك يا فطومة

وانتى دايما منوره كل مواضيعى يارب بطلتك عليها يا احلى قمر

ياريت كل الناس تشجع منتجات بلدها

دا احنا عندنا احلى قطن

ربنا يكرمك يا فطومة فكرتينا بحاجات منسية عندنا