" مَنْ كَانَ لَهُ شَعْرٌ فَلْيُكْرِمْهُ "

صدق رسول الله صلي الله عليه وسلم
حَدَّثَنَا عَبْدُ اللَّهِ بْنُ جَعْفَرٍ ، حَدَّثَنَا إِسْمَاعِيلُ بْنُ عَبْدِ اللَّهِ ، حَدَّثَنَا سَعِيدُ بْنُ مَنْصُورٍ ، حَدَّثَنَا ابْنُ أَبِي ذِئْبٍ ، عَنْ سُهَيْلٍ ، عَنْ أَبِيهِ ، عَنْ أَبِي هُرَيْرَةَ رَضِيَ اللَّهُ عَنْهُ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " مَنْ كَانَ لَهُ شَعْرٌ فَلْيُكْرِمْهُ " .
واحنا نازلين بهدله وتقطيع واهمال لشعرنا وفي الاخر
بنزعل ونعيط ونقول شعرنا وحش لأ
انتي اللي اهملتي شعرك وهو عضو منك وانتي لازم تهتمي بيه
وتكرميه عشان هو يكرمك ويخلي شكلك قمر لان شعرك
تاجك وهو زي الطفل بتغذيه صح بينمو ويكبر صح الصح
لأن ما بني علي باطل فهو باطل طولت عليكم رخمه صح
المهم ايه رأيكم كل يوم هكتب نصيحه للشعر وعاوز دعوه جامده
ليا وللدكتوره صاحبه النصايح وكل واحده منكم تدخل تقول
مشكلة شعرها ايه وعمرها كام وعاوزه شعرها يكون ايه
وعاوزه تفاعل كبير وانشاء الله علي اخر رمضان هيكون شعرها
تحفه تعالوا نشجع بعض ونحافظ علي تاجنا

اول نصيحه يارب نعمل بيها بس
هي تسريح شعرك حبيبك تاجك

لو مغسول
لازم ينشف تحت الفوطه ربع ساعه وبعدين تسرحيه من تحت لفوق بمشط واسع يعني تحت الاول وبعدين تطلعي شوية شويه علشان ميتقطعش
بلاش القسوة براحه عليه ده حته منك
طبعا المشط الخشب ضروري جدا جدا جدا لو ناشف لكن لو مبلول ممكن جدا البلاستيك

لكن لو مش مغسول وده اللي قصدي عليه

تسرحيه من تحت لفوق لوملبك ولما يتسلك تسرحيه من فوق لتحت جزء جزء وبحنيه وحب براحه خالص لانك كده بتنقلي الزيوت المفيده جدا اللي بتفرزها فروة الراس لباقي شعرك وبتنشطي الدورة الدمويه في فروة الراس
وده يجعل نمو الشعر اسرع
التسريح يكون 100 مرة لكل جزء يعني حوالي خمس دقايق

مستنيه بكرة تقولولي لما سرحتوه بالطريقه ده حسيتوا بايه لان في حاجه هتحصل
وهعرف منها مين اللي سرح ومين اللي مسرحش شعره اوكي؟؟

انا فعلااااااا بسرحه كدة بس كل يوم بليل قبل منا
وكملىىىىىىى انا معاكى علشان عاهدت نفسى اهتم بشعرى حبيبى الشهر دة

gasym ربنا يجبر بخاطرك حبيبتي
انا قلت البنات خلاص شعرهم مش محتاج
حاجه وما حدش بيسأل لكن ربنا يكرمك
يا حبيبتي فتحتي نفسي اقول تاني نصيحه
عشان عيونك يا قمر

تقصف الشعر ( حبيبك )

الاسباب علشان نتجنبها :

1- جفاف طارئ بساق الشعر أو أطراف الشعر نتيجة زيادة جفاف الجو أو ارتفاع درجة حرارته بنسبة كبيرة.

2- الانتقال من بيئة ذات جو عادي إلي جو حار.

3- غسل الشعر بنوع من الصابون القوي المزيل للدهون فيفقد الحد الأدنى من المواد الدهنية اللازمة لمرونته وقوة تحمله.

4- عدم العناية بشطف الشعر جيدا بالماء النقي بعد غسله بالصابون أو الشامبو.

5- ترك الشعر بدون غسيل مدد أكثر من اللازم فتتراكم الأتربة حول ساق الشعر فتسبب تقصفه.

6- كثرة غسل الشعر أكثر من المعدل الطبيعي مما يجعله يفقد المواد الدهنية والأملاح اللازمة لمرونته وحمايته .

7- تعريض الشعر لفترات طويلة تحت السيشوار حتى يصاب بالتيبس والجفاف.

8- سوء التغذية.

10- استخدام بنس الشعر

11- تجفيفه بالفوطه بعنف

12- تسريحه بعنف وشده

13- الصبغة والفرد والافراط في تجعيده

نيجي للمفيد

هتعرفي ازاي اذا كان شعرك حبيبك مقصف ولا لا؟؟؟؟

تمسكي شعرك من تحت لو لقيتي شعر مقسوم اتنين او اكتر يبقى مقصف

لو ملقتيش كده؟

امسكي شعرة واحده من جذورها لاطرافها وحسسي عيها بين صوابعك لو لقيتي فوق اتعم من تحت يبقى مقصف

99% مننا شعرهم هيطلع مقصف

نعمل ايه؟؟

اول حاجه نتجنب الاسباب
تاني حاجه المقص طبعا عند الكوافير او في البيت المهم فوق التقصيف ب 1 سم وتقصي

لازم لازم لازم

ليه؟؟

لان التقصيف بيزحف لاخر الشعرة وهيبوظها يعني هيبوظها يبقى لازم نقصه
علشان تحافظ على بقيته
الموضوع مش انه يطول بسرعه
لا يطول بصحه

مستنيه اشوف عملتي ايه؟؟؟؟؟

والنصيحه الخفيفه

غسل الشعر (حبيبك)

طريقة غسل الشعر
1-يجب تمشيطه قبل الغسل لازاله الاقذار والجلد الميت العالق بالشعر وفروة الراس التمشيط من الجذور للاطراف لو سالك والعكس لو ملبك وبعدين من الجذور للاطراف لما يسلك
2- بللي الشعر جيدا ثم يوضع الشامبو على اليدين ويدك في اليدين ثم يوضع على فروة الراس مع التدليك الجيد وبرفق ثم يشطف ثم يجفف بالمنشفة بالضغط ثم يوضع حمام الكريم ويمشط بمشط واسع برفق ثم يشطف جيدا بماء دافيء ثم بارد لغلق المسام المفتوحة ثم ينشف بالفوطه بالضغط ويترك ليجف تحت الفوطه 10دقايق او ربع ساعه ثم يتم تسريحه برفق ويضع الكريم المرطب عند الحاجه
اذا كان شعرك يعاني من التساقط اعملي عصير الجرجير وضعيه عل شعرك بعد غسله وقبل حمام الكريم واتركيه عشر دقائق ثم اشطفيه
وحمام كريم حلو ومغذي هو بوناويل بالقمح ممتاز
وربنا يكرمك وشدي حيلك

انا استعملت باناويل ده مرة بس محستش بأي فرق حسيت انه نشف

انا عندي 19 سنة و نص

شعري بأه مش عايزة اقولك اكيد و طبعا مقصف و بيهيش عالطوووووووووووووول انا بلمه عالطول كحكه مبينفعش غير كده هو مش طويل و لا قصير يعني طوله عادي

نفسي يكون حلو كده و نازل مفرود و ناعم و مش مقصف و طبعا عايزة حاجة سهله )
لو حتى اي حاجة اشتريها من الصيدلية

انا جبت كريم دابر املا الاصلي و معملش اي حااااااجة (

ياريت تساعديني
و شكرا ليكي

فيييييييييييييييييينك يا نووووووور
انا نفسى شعرى يتقل ويوقف التساقط بتاعه يعنى تقريبا ابتديت اشوف ان التساقط قل علشان بحط تووووووووووووووووووووم مرتين فى الاسبوع بس لسة عايزة اشترى زيوت مغذية اللى هى خروع ولوز حلو وزيتون وجرجير ونخاع

تسلم ايديكى يانونا

princessshrouk كتب:انا استعملت باناويل ده مرة بس محستش بأي فرق حسيت انه نشف

انا عندي 19 سنة و نص

شعري بأه مش عايزة اقولك اكيد و طبعا مقصف و بيهيش عالطوووووووووووووول انا بلمه عالطول كحكه مبينفعش غير كده هو مش طويل و لا قصير يعني طوله عادي

نفسي يكون حلو كده و نازل مفرود و ناعم و مش مقصف و طبعا عايزة حاجة سهله )
لو حتى اي حاجة اشتريها من الصيدلية

انا جبت كريم دابر املا الاصلي و معملش اي حااااااجة (

ياريت تساعديني
و شكرا ليكي

بايوبوينت بالنخاع تحفه حمام كريم تحفه

gasym كتب:فيييييييييييييييييينك يا نووووووور
انا نفسى شعرى يتقل ويوقف التساقط بتاعه يعنى تقريبا ابتديت اشوف ان التساقط قل علشان بحط تووووووووووووووووووووم مرتين فى الاسبوع بس لسة عايزة اشترى زيوت مغذية اللى هى خروع ولوز حلو وزيتون وجرجير ونخاع

حلو اوى الزيوت ديه كلها استمرى على الثوم هينبت الله معلش برد بالنيابه عن نور علشان كليتها مش بتدخل كتير يارب قويها يارب وهاتى الزويوت اللى كتبتيها تحفه