قبل العيد.. اشتري لحمة صحية وخلّي أكلاتك شهية

إزاي تشتري لحمة صحية؟!
أول حاجة لازم اللحمة تكون متغطية بالشاش الأبيض، ويكون ختم البيطري واضح عليها.

وخلي بالك إن ألوان الختم دي بتختلف حسب نوع اللحمة؛ يعني هتلاقي اللحمة البلدي مختومة بختم لونه أحمر، أما اللحوم اللي بتكون مستوردة ومذبوحة محليا بتكون مختومة بختم لونه بنفسجي.

كمان الختم بيختلف حسب سن الذبيحة، يعني الذبائح الصغيرة بتكون مختومة بختم مربع، أما الذبائح الكبيرة السن بيكون ختمها مثلث.

مهم أوي إن اللحمة يكون لونها وردي وباين إنها طازة، كمان تكون ريحتها مقبولة ومايكونش فيها أي زفارة، وتكون أنسجتها متماسكة؛ يعني مايبقاش سهل قطعها بأظافر الإيد، ويكون ملمسها جاف إلى حد ما؛ يعني ما تكونش مندية أو عليها أي مواد لزجة.

بالنسبة لدهن اللحوم فلونها بيختلف حسب نوع اللحمة، يعني اللحمة الجاموسي والضاني بيبقى الدهن بتاعها لونه أبيض ناصع، أما اللحمة البقري دهنها بيبقى مائل للاصفرار.

اللحمة الضاني.. استفيدي من فوايدها وتجنبي أضرارها
طبعا في العيد بيزيد إقبالنا على تناول اللحمة الضاني؛ لكن خبراء التغذية بينصحوا دايما بعدم الإكثار منها؛ وده لارتفاع السعرات الحرارية، ونسبة الكوليسترول فيها، واللي طبعا بيؤثر على الرشاقة، وبيبقى خطر على القلب وعلى مرضى الكوليسترول؛ بس ده طبعا لا ينفي إنها تحتوي على فوايد تانية زي الفيتامينات؛ وخاصة مجموعة فيتامين (ب)، وكمان بتحتوي على معادن؛ زي: الحديد، والفوسفور، والكالسيوم، والبوتاسيوم، وده بيخلّي اللحمة الضاني مفيدة جدا في تنقية الدم وتقوية الذاكرة للإنسان.


وعلشان تتفادي أضرار اللحمة الضاني فخبراء التغذية بينصحوا بتناول مناطق معينة من اللحمة الضاني؛ منها:

الرقبة والفخذ.. وده لأنها أقل مناطق في كمية الدهون اللي بتحتويها.

الكبدة.. غنية بالبروتين والحديد، وكمان بتحتوي على فيتامين (أ) و(د)، وطبعا تقدري تنوّعي في طريقة تقديمها؛ إما مشوية أو مطبوخة.

المخ.. كمان من الأجزاء اللي بيفضّلها كتير من الناس؛ لأنه سهل الهضم، والجزء ده بيحتوي على نسبة عالية جدا من الفوسفور المفيد للعظم، وكمان نسبة عالية من فيتامين (د).

أحسن الطرق لحفظ اللحوم
يُفضّل قبل ما تشيلي اللحمة في الفريزر إنك تقطّعيها لقطع صغيرة مناسبة مع الحجم اللي إنتِ بتطبخي به، وتشيليها في الفريزر من غير ما تغسليها؛ لأن الرطوبة العالية ممكن تتسبب في إن اللحمة تفسد بسرعة، وكمان يُفضّل إنك تشيلي قطع الدهون اللي بتكون موجودة على اللحمة من بره؛ خاصة اللحمة الضاني.

ولما تيجي تطبخيها يُفضّل إنك تطلّعيها وتحطيها في الثلاجة قبل الوقت اللي هتطبخيها فيها بـ10 ساعات.

بس خلي بالك وإنتِ بتقسّمي اللحمة في أكياس الحفظ أو في الأطباق الفِل، إنك تحطي في كل كيس الكمية اللي تكفي لوجبة على حسب عدد أفراد أسرتك؛ علشان ما تضطريش إنك تجمّدي اللحمة اللي هتتبقى بعد ما تسيح؛ لأن تجميد اللحمة بعد تسييحها ممكن يخلّي اللحمة تتلف أو يتغيّر طعمها.

وبعد ما تقسّميها تخلّصي من الهواء الزيادة اللي موجود في الكيس، وحطيه في الفريزر، ويُفضّل إنك تحطي اللحمة على سطح الفريزر مباشرة.

وعلى فكرة أنتِ ممكن تغسلي اللحمة وتشوّحيها على النار لمدة 5 دقايق قبل ما تشيليها في الفريزر مع شوية ملح وفلفل، وبعد كده تسيبيها تبرد خالص، وبعدين تقسّميها في الأكياس وتشيليها في الفريزر بنفس الطريقة اللي قلنا عليها، وبكده تبقى اللحمة جاهزة عندك، ولما تحتاجيها في أي وقت هتطلّعيها من الفريزر وتحطيها على النار مباشرة، ومش هتستني لما تسيح، وتعمليها بعد كده بالطريقة اللي أنتِ عايزاها.

أما اللحمة المفرومة ممكن تعصّجيها وتسيبيها تبرد قبل ما تشيليها في الفريزر، وتقسّميها على أكياس وتفرّغي منها الهواء، وبكده تبقى جاهزة عندك علشان تعملي بها صواني المكرونة بالبشاميل والجلاش والرقاق والطواجن.

ودي طريقة تتبيل اللحمة المفرومة: وهي إنك تجيبي بصلة وتقطّعيها لقطع صغيرة، وتشوّحيها على النار في سمن أو زيت، وبعد ما البصل يتحمّر شوية حطي اللحمة المفرومة والبهارات والملح، وسيبيها على النار لغاية ما تتعصّج.



عيد سعيد عليكم كلكم

تسلمي يا قمر