خواطر بنت مقبلة على الزواج

بكرة فرحي يا جدعان
****************
ياترى عمرك فكرت في احساس الجنين ليلة ميلاده ؟؟
متهيألي أنا دلوقتي عارفة احساسه ..
هو بيكون مرتاح جوا بطن مامته .. ومطمن ..
بس مشتاق يتولد ..
مشتاق للنور .. للحياة ..
الحياة المختلفة عن حياته جوا ..
مشتاق يبدأ حياة حقيقية ..
بكل فرحتها ولذتها وشقاها وتعبها ومشاكلها .

أنا دلوقتي كده ..
حاسة اني هتولد بكرة ..
وهبدأ حياة جديدة ومختلفة
حياة اخترت فيها حاجات كتير أوي
وبحب فيها حاجات كتير أوي?
وخايفة فيها من حاجات كتير ..
خايفة من المسؤولية
وخايفة لأني بردو مهما عرفتك حاسة اني لسة ما اعرفكش
أو لسة ما اتعودتش عليك أوي لدرجة اننا نعيش أربعة وعشرين ساعة مع بعض .

وقلقانة .. مش عارفة الفرح هيكون ازاي ؟!
ياترى هتحصل مشكلة تبوظ عليا اليوم اللي مستنياه طول عمري ؟؟
ولا هيعدي على خير ؟

ومش عارفة ازاي بجد بعد ما الفرح يخلص مش هروح مع بابا وماما واخواتي !!

وفي نفس الوقت فرحاااانة أوي إننا أخيراً هيكون بيتنا واحد
ولما نكون برة البيت مع بعض ونقول هنروح يبقى دا معناه اننا بردو هنفضل مع بعض ..??
مش كل واحد يروح في طريق .

ياربي .. أنا مش عارفة أنام ، ومش عارفة أصحى ..
ومش عارفة افرح ولا اعيط .. عايزة أفرح .. ومحتاجة أعيط !!

عارف إحساسى بالظبط يتوصف ازاى ؟؟
عارف أغنية أغداً ألقاك ؟؟
هى دى أدق وصف لحالتى ...
" أغداً ألقاك .. يا خوف فؤادى من غدى .. يالــ شوقى و احتراقى .. فى انتظار الموعدِ ? "

النهاردة انا عروســــــــة
******************
صحيت من النوم بإحساس العروسة
حاسة اني مختلفة رغم إني مش متغيرة
حاسة إني فرحانة وقلقانة ..
ومكسوفة أوي من كتر ما الناس عمالة تقول لي يا عروسة ، وايه الحلاوة دي ..
رغم اني ما كنتش لسة احلويت ولا روحت الكوافير وكده !
حاولت أفطر وما عرفتش ..
أنا أساساً لما بفرح ما بعرفش آكل
وانا عمري ما فرحت قد النهاردة ..
ولما بكون قلقانة ما بعرفش آكل ..
وعمري ما قلقت قد النهاردة ...
وكمان لما بزعل ما بعرفش آكل ..
وانا زعلانة إلى حد ما النهاردة ..
مش عارفة ازاي هعيش في بيت ماما مش عايشة فيه ..
وانا اللي كنت لما ماما تسافر ما بعرفش آكل ولا اشرب ولا انام ولا اعمل أي حاجة .
كمان مش متخيلة اني بكرة لما اصحى من النوم مش هلاقي نفسي في أوضتي ..
وإني أصلاً المفروض ابطل اعتبرها أوضتي !
ولما جينا ماشيين أنا واصحابي علشان أروح الكوافير ..
حاولت على قد ما أقدر ما ابصش في عين ماما علشان ما اعيطش ...
بس بمجرد ما اخدتني في حضنها ماقدرتش ..
عيطنا أووي وما كنتش عايزة اسيب حضنها
لحد ما ماما ضحكت بالعافية وقالت لي .. " يخرب عقلك الناس هتفتكرنا غاصبينك على الجوازة ههههه " ..
ضحكت وسيبتها و رايحة اسلم على بابا
عمل نفسه مشغول وانه بينده للسواق يقرب العربية قدام الباب
وحاول على قد ما يقدر ما يبصليش علشان خايف دموعه تغلبه ..
هيوحشوني أوي ..
هيوحشني احساسي بإني بنتهم وآخر العنقود ..
رغم اني هفضل بنتهم ورغم اني هشوفهم تاني كمان شوية في الفرح وبعد الفرح وبعد كده كمان هشوفهم وازورهم دايماً .. بس هبقى بزورهم .. مش عايشة معاهم ..
هبقى كبرت خلاص .

اصحابي طول المشوار قعدوا يتريقوا عليا ويضحكوني ..
قعدوا يرغوا يرغوا يرغوا ..
ما بيسكتوش لحظة مش مديني فرصة اتكلم خالص ..
علشان عارفين انهم لو سكتوا انا هسرح في ماما و بابا وهعيط
وعارفين انهم لو سابوني اتكلم هعيطهم هم نفسهم ..

وصلنا الكوافير
والست الكوافيرة قعدت تحط لي ماسكات غريبة على وشي وانا اضحـــــك ..
كل ما اقعد اتخيل شكلك لو شوفتني بالمنظر دا هتقول ايه ..
من كتر ما ببتسم واضحك الست قلقت مني فخفت تفتكرني مجنونة وتخاف تعمل لي حاجة
فقولت لاصحابي علشان تسمعني اللي انا بفكر فيه ..
كلهم فطسوا من الضحك وقعدت كل واحد تتوقع تعليقك ..
وفي الآخر الأندال صوروني وهددوني يبعتولك الصور دي على الكوشة .

بعد اما شيلت الحاجات الغريبة دي من على وشي لبست فستان الفرح
ساعتها بجد رجع لي الاحساس المرعب بإني عروسة !
بدأت بقى تحط لي الميك آب وتحاول تلعب في دماغي انها تحطه اتقل من كده شوية
بس ميييييييين أنا دماغي صعيدية
آخر ما زهقت قولتلها :
" بصي من الآخر انا عايزة ميك آب لما اشيله ما يتخضش ويقول ماليش دعوة رجعوها ان عايز اللي كانت في الفرح "
الست ضحكت وهي بتحط لي حاجة ما اعرفهاش في عيني وعيني كانت هتروح
وفي الآخر اقتنعت .. يا اما بوجهة نظري .. يا اما بإني مجنونة ولازم تاخدني على قد عقلي

غمضت عيني علشان تكمل اللي هي بتعمله ..
وسرحت .. مافوقتش غير على صوت اصحابي وهم بيقولوا
" ماشاء الله ايه الجمال دا يا نــيـــنــو "
فبصيت في المراية لقيتها خَلَصِت ..
اول ما شوفتني قولت ايه دا ؟؟ مين دي ؟؟
ايه الخدع السينيمائية دي ؟؟
وقعدت اتخيل نظرتك أول ما عينك تقع عليا ...
وياترى ايه اول حاجة هتقولهالي ..
وكالعادة .. كل ما افكر فيك بالاقيك ..
لقيتك بتتصل بيا بتقول لي انكم وصلتوا ..
خلاص ينفع تدخلوا ولا لسة ؟؟

ورغم اني مخلصة .. وهموت واشوف نظرتك ورد فعلك ..
قولت لك "لأ لسة شوية "
اصحابي استغربوا افتكروا ان في حاجة في الفستان او الميك آب
و الكوافيرة اتخضت
بس لما قولت لهم ان كل العرايس بتتأخر اشمعنى انا ؟؟
كانوا هيضربوني لولا اني عروسة هههههههههه

بس الحقيقة هي اني ما كنتش مستعدة نفسياً لأي حاجة في أي حاجة ..
اعصابي بايظة جداً ومكسوفة جداً
وحاسة ان الموضوع هيدخل في الجد بقى لما اخرج من هنا .
قعدت حوالي ساعة .. الكوافيرة تقول لي يابنتي ما ينفعش المكان هنا مش مكيف والميك آب كله هيسيح ..
وانا ماااافيش ..
واصحابي يقنعوني اخرج ..
وانت وبابا واخويا عمالين تتصلوا بيا ..
وانا مش قادرة كل ما اشوف استعجالكم اتوتر زيادة !

في الآخر واحدة من اصحابي استندلت وطلبت ماما من ورايا وقالت لها اننا مخلصين .
.كنت عايزة اقتلها .. لولا اني عروسة بردو

ماما ما رضيتش تدخل علشان ما نعيطش تاني ..
وبابا واخويا دخلوا بقى ياخدوني ليك ..
انت أول ما لمحتني من بعيد شوية عينك لمعت ودمعت ..

لما قربت بقى ماعرفتش اشوف تعبيرات وشك
لأني من كسوفي ما قدرتش ابص في وشك ..
مسكت ايدي وقولت لي بالراحة ..
" اكتر حاجة بموت فيها فيكي من زمان هي كسوفك "
انا : ..........

" عارفة .. انا طول عمري شايفك حلوة ..
بس النهاردة انتي أحلى ..
مش علشان الفستان اللي هياكل منك حتة
ولا علشان الميك اب اللي مبين جمالك أوي ..
انا شايفك حلوة أوي النهاردة .. علشان انتي النهاردة حلالي "

لحد كده بقى وكفاية ما قدرتش ..
قولتلك خلاااااص هيغمى عليا اسكت بقى .

قعدت تضحك عليا بردو لحد ما وصلنا للعربية ..
و.... حاجات كتير أوي حصلت وانا مش فاكرة أي حاجة ..
كل اللي فاكراه اني كنت مش مصدقة
واني قولت لك :
" هو النهارده فرحنا بجد ولا انا بحلم ؟؟"
فضحكت
وشوية تاني قلت لك " هو انت مصدق ؟؟ "
فضحكت بردو ..
وبس مش فاكرة أي حاجة حصلت بعد كده
خواااااااااااطر اى بنت قبل فرحها ويوم فرحها كل ده بيدور فى دماغهاالكلام ده عن لسان عروسة قريبة منى وعقبال بنتى وكل البناااااات يااااااااااااارب ولو ان بنتى بتقول الكلام ده من قبل ما ترتبط ربنا يسعد كل البنات ويرزقهم بالازواج الصالحين امين يا رب العالمين

فعلا ده كلام واقعى ميه بالميه
تسلم ايدك

جميله اوى وكلام من ارض الواقع بجد جميله جدااااااااااااااا بحب الحوارات اللي في واقعنا بجد احساس بيبقي حلو ومخيف بس الدنيا كلها بتعدي فكرتينى بزماااااااااااااان تسلمي يا احلي ميرفت

ياالله رووعه روووعه روووعه
دا انا حسيت اني انا العروسه ههههههه
تسلمي ياقمر علي موضوعك واحلي تقييم لعيونك

فعلا كلام من ارض الواقع
وانا بقرا الكلام رجعت لى ذكرى الايام

الف شكر لكم على تواجدكم فى موضوعى يارب يسعد كل اوقاتكم يااااااااااارب

حلووووووووووووووووووووووو اووووووووووووووووووى الخواطر دى بجد حسيتها اوى تسلم ايديكى

حلوة اووووي