المكرونه بنكهات ايطاليه مختلفه

ورحمة الله وبركاته

انهارده جيبالكم صلصات مختلفه للمكرونه سهله جدا ولذيذة

انا قبل كده كنت جبتلكم طريقة المكرونه بالجمبرى والكوسه والقشطه

والمكرونه بالتونه


انهارده بقى حنتكلم عن

المكرونه بصلصة الطماطم بس بالطريقه الايطاليه

حنسلق المكرونه فى ماء وملح بيغلى ولازم تظبطى وقت السوى ماتسيبيهاش لحد ماتتهرى

وهى بتتسلق نحضر الصلصه

حنحمر فصين ثوم فى شوية زيت زيتون بس ماتسيبيهمش يتحمرو قوى يعنى يادوبك يصفرو
تضيفى الصلصه وماتسيبيهاش تتسبك جامد والصلصه بتكون عباره عن طماطم مع شوية صلصة طماطم
وتضيفى مع الطماط وهى بتستوى مكعب مرقة ماجى وممكن فى الاخر تضيفى بقدونس بيدى نكهه وممكن لا زى ماتحبى

تصفى المكرونه وتضيفيها للصلصه
وفى الاخر تضيفى جبنه بارميجان مبشوره او جبنه رومى او ممكن تستغنى عنها


المكرونه البيضا

حتسلقى المكرونه ولما تستوى تصفيها وترشى عليها جبنه بارميجان و زيت زيتون وبس
بتكون خفيفه وطعمها جميل والاطفال بيحبوها وبتكون مناسبه جدا للاطفال الى عمرهم اقل من سنه


كمان ممكن تحمرى فص ثوم فى زيت زيتون وتضيفى ليه المكرونه المسلوقه وبس

مكرونه بالباذنجان والمودزاريلا

حتحمرى بصل مع فلفل فى شوية زيت زيتون وتضيفى ليهم مكعبات البادنجان ومكعبات طماطم وفى الاخر تضيفى المودزاريلا


المكرونه عموما ممكن انتى تبدعى فى صلصتها تخلطى انواع خضار مختلفه زى الجزر مع البسله او الجزر مع الكوسه
ممكن تضيفى لحمه مفرومه او تضيفى عيش غراب مع صلصة الطماطم



كمان ممكن نعمل صلصه عباره عن بصل وفلفل وثوم وصلصه وعيش غراب وزيتون

الافكار كتير جدا ومتنوعه وده مهم جدا عشان التغيير

ان شاء الله اجبلكم افكار جديده المره الجايه

ماتنسوش التقييم لو الوصفات عجبتكم

موضوع جميل يا فطومه عزومه رمضان عملتها كلها ايطالي علشان ابقي مغيره شويه فعلا عن المحاشي والعادي تسلم ايديكيي يا فطومه يا حبيبتى

الله الله يافاطومه
جميله جدا
تسلم الايادي

وكل سنه وانت طيبه

تسلمولى انتم يارب
وبجد وحشتونى جدا انتم الاتنين

قوليلى ياكليوباترا ايه الاكلات الى عملتيها فى العزومه

تسلم الايادى

ميرسي ليكي يا فاطمة الزهراء طرق جديدة في الاكل هجربها لخطيبي حبيبي

ادعولي يا بنات ربنا يجمع بيني وبينة علي خير ويحمهولي يارب ويخليه ليا

وكل سنة وكل اعضاء المنتدي بخير يا رب

انا عاوزة اعرف الصلصة بالوايت صوص
عملتها قبل كدة مرتين
بس عاوزة اعرف الطريقة مظبوووووووط
عشان كنت برتجل

دوما توك كتب:تسلم الايادى

يارب

شريكة العمر كتب:ميرسي ليكي يا فاطمة الزهراء طرق جديدة في الاكل هجربها لخطيبي حبيبي

ادعولي يا بنات ربنا يجمع بيني وبينة علي خير ويحمهولي يارب ويخليه ليا

وكل سنة وكل اعضاء المنتدي بخير يا رب

ربنا يتملك على خير يارب ويسعدكم

سمر محمد كتب:انا عاوزة اعرف الصلصة بالوايت صوص
عملتها قبل كدة مرتين
بس عاوزة اعرف الطريقة مظبوووووووط
عشان كنت برتجل

انتى قصدك على انى صوص بالظبط قوليلى ايه مكوناته يمكن اعرفه