برياني الفراخ ورموش الست في عزومة 13 رمضان

أعدها لكم: رنا حسين والشيف أحمد فتحي



عصير البطيخ والفراولة باللبن
المقادير:

• 1/ 4 بطيخة مقطّعة شرايح
  
• 1/ 4 كيلو فراولة طازجة
  
• سكر (حسب الرغبة)
  
• 2 كوب لبن
  
• كوب ميه
  
• ثلج
  

الطريقة:
حطّي كل المكونات مع بعض في الخلاط، واضربيهم كويس لغاية ما يمتزجوا كويس، وبعد كده صبيهم في الكاسات وقدّميهم.



ملحوظة:
يفضل إنك تعملي العصير ده قبل التقديم على طول.



سلطة الراهب
المقادير:

• ثمرة كبيرة بانجان رومي
  
• ثمرة فلفل أخضر مقطّع مكعبات صغيرة
  
• حبة طماطم مفرومة ناعم
  
• 1/ 4 كوب بقدونس مفروم
  
• بصلة متوسطة مفرومة
  
• ملعقة كبيرة زيت زيتون
  
• 1/ 4 كوب عصير ليمون
  
• ملعقة صغيرة ملح
  
• فص ثوم مهروس
  
• أوراق نعناع أخضر
  

الطريقة:
1- هاتي عود خشبي رفيع، واعملي ثقوب في الباذنجان، وبعد كده اشويه في الفرن أو على البوتاجاز من فوق، لغاية ما تحسّي إن الباذنجان استوى من جوه، وبقى طري، واعملي نفس الخطوة مع البصل.



2- قشّري الباذنجان، وبعد كده اهرسيه بالشوكة، واهرسي معاه البصلة اللي شويتيها.


3- ضيفي عليه الثوم والفلفل والطماطم والبقدونس وعصير الليمون والملح، وقلّبيهم كويس مع بعض لغاية ما المكونات كلها تمتزج مع بعض.


4- حطّي السلطة في أطباق التقديم، وعلى الوش ووزّعي زيت الزيتون، وزيّنيها بأوراق النعناع.




شوربه الفراخ بالكريمة
المقادير:

• 2 صدور فراخ مسلوقة ومقطّعة مكعبات
  
• 1/ 2 كوب كريمة طبخ (هتلاقيها في السوبر ماركت)
  
• 1/ 2 كوب لبن ساخن
  
• 3 أكواب شوربة فراخ
  
• 2 ملعقة كبيرة دقيق
  
• ملعقة كبيرة زبدة
  
• ملح وفلفل
  

الطريقة:
1- حطي الزبدة على النار، وسيبيها لغاية ما تسيح، وبعد كده ضيفي الدقيق، وقلّبيهم مع بعض على النار؛ لغاية ما تحسي إن الدقيق اتحمرّ وبقى لونه ذهبي.

2- بعد كده ضيفي الشوربة واللبن الساخن مع التقليب المستمر، لغاية ما تحسي إن قوامه بقى سميك.

3- تبّلي الشوربة بالملح والفلفل، وضيفي عليها قطع الفراخ المسلوقة.

4- عند التقديم، ضيفي الكريمة على الشوربة، وعند التقديم ممكن تزينيها بالبقدونس المفروم.




برياني بالفراخ
المقادير:

• 3 أكواب أرز بسمتي
  
• فرخة كيلو مقطّعة قطع صغيرة
  
• ملعقة صغيرة نعناع أخضر مفروم
  
• 2 ثمرة بطاطس مقطّعة مكعبات
  
• كوب فاصوليا خضراء مقطّعة
  
• 2 ثمرة جزر مقطّعة مكعبات
  
• ملعقة كبيرة زنجبيل مفروم
  
• 1/ 4 كوب بقدونس مفروم
  
• 2 ثمرة فلفل أخضر مفروم
  
• ثمرة بصل كبيرة مفرومة
  
• 4 فصوص ثوم مفرومين
  
• ملعقة صغيرة حبهان
  
• ملعقة صغيرة كزبرة
  
• 2 ملعقة كبيرة زبدة
  
• 2 ملعقة كبيرة زيت
  
• ملعقة كبيرة كاري
  
• ملعقة صغيرة قرفة
  
• ملح وفلفل أسود
  
• 2 كوب زبادي
  
• بصلة كبيرة
  
• ورق لاورا
  

الطريقة:
1- اغسلي الأرز وانقعيه في الميه حوالي ربع ساعة، وبعد كده اسلقيه في ميه مغلية وضيفي عليه البهارات وملعقة كبيرة من الزيت.


2- في الوقت اللي الأرز فيه بيستوي، هاتي حلة تانية، وحطّيها على النار، وحطّي فيها ملعقة كبيرة زبدة، وملعقة كبيرة زيت، وشوّحي فيها البصل المفروم والزنجبيل والثوم المفروم، وقلّبيهم مع بعض كويس.


3- بعد كده ضيفي عليهم قطع الفراخ والفلفل الأخضر، وشوّحيهم مع بعض وضيفي عليهم البهارات القرفة والكزبرة والحبهان والملح والفلفل والكاري والكركم والنعناع، وقلّبيهم مع بعض كويس جدا، وضيفي على الخليط نصف كوب ميه، وسيبيهم على النار لغاية ما الخليط يستوي.


3- بعد ما الأرز يستوي، صفّيه من الميه بتاعته وسيبيه على جنب.


4- ضيفي الزبادي على خليط الفراخ اللي على النار، وقلّبيه الخليط كويس، وبعدين ضيفي قطع البطاطس والجزر والفاصوليا الخضراء، وفي الآخر ضيفي الأرز، وسيبي الخليط على النار لغاية ما يغلي.


5- حطي البرياني في طبق التقديم، وممكن تزيّنيه بالمكسرات وعيدان البقدونس الأخضر.




رموش الست
المقادير:

• 1/ 3 كوب دقيق سميد
  
• 1/ 2 ملعقة كبيرة بيكنج باودر
  
• 3 1/ 2 كوب دقيق
  
• كوب سكر بودرة
  
• ملعقة كبيرة زبدة
  
• 3 بيضات
  
• فانيليا
  

لتحضير الشربات:
حطّي 2 كوب سكر مع كوب ميه على النار لغاية ما يغلوّا، وبعد كده حطّي عليهم عصير نصف ليمونة ورشّة فانيليا، وسيبيهم يغلوّا مع بعض لغاية ما قوام الشربات يبقى تقيل.


الطريقة:
1- اضربي السكر البودرة مع الزبدة بالمضرب الكهربائي، لغاية ما الخليط يبقى شكله زي الكريمة.

2- بعد كده ضيفي عليهم البيض والفانيليا مع الاستمرار في الخفق، وبعد كده ضيفي عليهم دقيق السميد وقلّبي الخليط مع بعضه كويس.


3- اخلطي الدقيق العادي مع البيكينج باودر، وبعد كده ضيفي الدقيق على خليط دقيق السميد بالتدريج، مع التقليب لغاية ما تحصلي على عجينة متماسكة تقدري تشكّليها بسهولة.


4- قسّمي العجينة على شكل كور صغيرة، ورصّيها متباعدة عن بعضها في صينية مدهونة بمسحة خفيفة من السمن أو الزيت، واضغطي على كل كورة ضغطة خفيفة، وهاتي شوكة واعملي بها خطوط متوازية على كل قطعة.


5- دخّليها في فرن ساخن على درجة حرارة 180، لغاية ما تحمرّ، وأول ما تخرج من الفرن اسقيها بالشربات.



وبالهنا والشفا



منقول

تسلم ايدك يا قمر حلو اوى الوصفات دى

:سلمت يداكى:

وصفات جديده بجد تسلم ايديكى