بالورقة والقلم.. اشتري خزين رمضان بميزانية أقل

رمضان على الأبواب، وأكيد كل البيوت أعلنت حالة الطوارئ لاستقبال الشهر الكريم..

واكيد إنتِ كل يوم بتصحي وتنامي وإنتِ بتفكري في تجهيزات رمضان، وإيه اللي هتشتريه؟ وهتشتريه إمتى؟

والمشكلة كمان في الميزانية اللي لازم تتعاملي على أساسها..

مش بس كده، ده إنتِ كمان محتاجة إنك ترتّبي كل الحاجات اللي هتشتريها، وتخزّنيها بطريقة كويسة، علشان تبقي مستعدة دايماً طول الشهر لأي طوارئ..

عموماً مش لازم تقلقي خالص، كل اللي عليكِ إنك تهدي وتسترخي، وتقري معانا الحوار اللي عملناه لك مخصوص مع أ/ شيرين عز الدين، مدربة المنزل الحديث، واللي هنعرف معاها بالتفصيل وبالخطوات، إزاي نستعد لرمضان، من غير ما نعمل أي ربكة في البيت، ومن غير ما نحسّ إن فيه علينا أي ضغط..

• ميزانية شهر رمضان من الحاجات اللي بتعمل قلق في البيت؛ إزاي نحضّر نفسنا لرمضان بميزانية قليلة؟
  

ده حقيقي جداً، في رمضان البيوت المصرية بتصرف ميزانية كبيرة جداً؛ لكن لو بصّينا للموضوع بتعمّق شوية، هنلاقي إننا بناكل وجبتين بس؛ في حين إننا في الأيام العادية بناكل 3 وجبات؛ يعني المفروض إننا نوفّر في رمضان أكتر من الأيام العادية؛ لكن اللي بيحصل غير كده..

لو حطّينا ميزانية العزومات على جنب، هنلاقي إننا فعلاً بنوفّر، والسنة دي رمضان هييجي إن شاء الله في أول الشهر؛ يعني كلنا هنكون قبضنا، وبالتالي هيبقى سهل إننا نحدد الميزانية من البداية، كل اللي علينا إننا نمشي مع بعض على الخطوات دي، وإحنا بنحضّر طلبات الشهر..

1- نحاول إننا نحطّ ميزانية العزومات لوحدها؛ يعني لما أكون عارفة إني هاعزم ضيوف، أعمل ميزانية لوحدها، ونقول إنها هتتكلف مثلاً 200 جنيه، وأكون شايلة الفلوس دي على جنب من البداية.

2- بالنسبة لميزانية الشهر؛ فلازم أجيب ورقة وقلم، وأكتب احتياجاتي، وأحدد بالظبط كل حاجة بكام علشان أعرف أنا لما هانزل أشتري هادفع قد إيه؟

3- لازم أراعي وأنا باكتب الطلبات إني أبصّ على الحاجات اللي موجودة عندي أصلاً في المطبخ وفي الثلاجة؛ لأني ممكن ألاقي إن فيه حاجات موجودة عندي أصلاً بكمية كبيرة؛ فمش هاحتاج إني أشتريها.

4- وفي النهاية لما أنزل السوق، أشتري على قد احتياجاتي بس؛ لأننا في رمضان فعلاً مش بنستهلك أكل كتير، ولما بنعمل أصناف كتيرة، معظمها بيترمي في الآخر؛ خاصة إننا في الصيف، والأكل مش بيقعد كتير؛ فحاولي إنك ماتتأثريش بالإغراءات الكبيرة والعروض اللي بتعملها المحلات قبل رمضان.

وده مش هيكون بخل ولا حاجة، ده اسمه اقتصاد وتوفير ومراعاة لظروف الآخرين؛ لأننا لما بنجيب بكميات كبيرة أوي، ممكن اللي في السوق مايكفيش كل الناس؛ وخاصة في الظروف اللي بتمرّ بها البلد حالياً؛ فنراعي دايماً إننا نجيب الكميات اللي تكفينا وبس.

• طيب نبدأ نشتري حاجات رمضان من إمتى؟
  

كل ما كان بدري يبقى أحسن، علشان الزحمة طبعاً؛ يعني ممكن ننزل قبل رمضان بأسبوع أو 10 أيام مثلاً.

ولازم قبل ما السيدة تنزل تشتري خزين رمضان، تكون محددة الميزانية اللي هتشتري على أساسها، وتحدّد قائمة بالطلبات اللي هي محتاجة لها زي ما قلنا.

ويا ريت تحاول بقدر الإمكان إنها ماتزوّدش عن القائمة دي علشان ممكن في الآخر تلاقي نفسها بتشتري حاجات مالهاش لزوم.

وأنا بانصح دايماً إننا نشتري الحاجة اللي تكفّينا وبس، علشان نلاقي مكان نخزّنها فيه، من غير ما نحسّ إن المطبخ اتملى بالكراكيب.

كمان مش لازم ننسى إن رمضان السنة دي جاي في الصيف؛ فلازم نخلي بالنا إننا مانزوّدش في شراء خزين البيت أوي، ونحاول نقسّمه على مرتين في الشهر، وما نجيبش كل كمية رمضان مرة واحدة.

• إيه الاستعدادت اللي لازم ست البيت تعملها وهي بتخزّن حاجة رمضان؟
  

أهم حاجة إنها تنظّف المطبخ كويس جداً، ونجهّزه علشان يستقبل الحاجات اللي هتشتريها، ولازم نهتم جداً بتنظيف دُرف المطبخ من جوّه، ونوفّر مساحات فاضية علشان لو جبنا حاجات كتير شوية يبقى فيه مكان.

نفس الكلام بالنسبة للتلاجة، والتلاجة من أهم الحاجات في البيت، وبتتفتح وتتقفل كتير، وكل أفراد الأسرة بيستخدموها؛ فبيبقى سهل جداً إنها تتكركب، أو إننا ننسى الحاجات اللي فيها واللي ممكن تفسد؛ علشان كده لازم ننظفها ونرّتبها كويس قبل ما نشتري حاجة رمضان؛ لأن التلاجة في الوقت ده كمان بتكون فاضية نوعاً ما؛ فده وقت كويس إننا ننظفّها من غير ما نفصل الكهرباء عنها.

• طيب إيه هي أسهل طريقة لتنظيف وترتيب الثلاجة؟
  

ممكن ننظّفها بقطعة قماش مبللة بالميه والخل، وميزة الخل إنه بيمتص كل الروايح اللي بتبقى موجودة في الثلاجة.

لازم نهتم جداً بتنظيف الثلاجة كويس من بره ومن جوه، وكمان مش لازم ننسى الحرف بتاع جلدة التلاجة من ناحية باب التلاجة ومن ناحية التلاجة نفسها؛ لأن ممكن يكون عليه تراب أو أي حاجة تخلّي التلاجة ماتقفلش كويس، تقوم ماتسقعش كويس وتستهلك كهرباء أكتر، ونفس الكلام بالنسبة للفريزر مانحطّش حاجات مالهاش لازمة علشان يكون جاهز لحاجات رمضان.



ولو عايزة تعرفي بالتفصيل إزاي تنظفي ثلاجتك.. اضغطي هنا

• من المشكلات اللي بتقابلها ست البيت مع خزين رمضان في فصل الصيف، النمل، إزاي نتعامل مع المشكلة دي؟
  

ستات كتير فعلاً بتعاني من المشكلة دي، وكتير بيقولوا لي: "أنا عملت كل حاجة وبرده النمل بيرجع تاني".

الحل إننا نشوف أصل المشكلة إيه، مش بس ندوّر على علاج؛ لأن زي ما بيقولوا: "الوقاية خير من العلاج"، ودايماً باقول: ما دام فيه نمل بيظهر، يبقى أكيد فيه حاجة طالع يدوّر عليها، ولو البيت مافيهوش فتافيت ومافيش أكل مكشوف، يبقى النمل مش هيطلع.

علشان كده لازم أراعي دايماً إني لو عاملة كيكة مثلاً، أشيلها في علبة مقفولة ومتغطّية، وأحطّها في التلاجة.

وكمان الحاجات اللي مش بتتشال في الثلاجة والنمل ممكن ييجي عليها زي السكر والمكرونة، لازم أحطّهم في مكان مقفول كويس، أو في علب بلاستيك، ولو عندي مكان في درج الثلاجة ممكن أحطّهم فيها.

من الحاجات المهمة كمان، إننا نهتم جداً بتنظيف المطبخ بعد تحضير الأكل، وإننا نغسل البوتاجاز، ومانسيبش أي مواعين في الحوض.

ومش لازم ننسى إننا نطّلع سلة المهملات بره البيت كل يوم أو يومين بالكتير، وأهم حاجة إن أكياس القمامة تبقى مقفولة كويس ومرشوشة، وممكن نحطّ على كيس القمامة نقطة أو نقطتين فنيك علشان الحشرات والذباب ما يتلمّش عليها.

منقووووووووووووووووووووووووووووووول

يا مريوم يا جامد تسلمي يا قمر كل سنه وانتى وعيلتك يا قمر طيبيبين يارب

روعة روعة بجد تسلم ايدك حبيبة قلبى