نفسي أحب مصر بجد !!؟؟

نفسي أحب مصر بجد !!؟؟

انا
بحب مصر جدا .. بس تيجى تسألنى بتحبى مصر ليه؟؟ هقول لأنى من مصر و اتولدت
لقيت نفسى مصرية وطول عمرى بحس ان احساسنا كمصرين ببلدنا عالى .. بحس اننا
بنحب بلدنا غير أى حد .. بنحبها حب غير مشروط زى أى أم ما بتحب ابنها ..
مابتحبوش لانه أسمر او أبيض مابتحبوش لانه قليل الادب أو مؤدب مابتحبوش
لانه خيبان وعنيد ومبيسمعلهاش كلمة أو لانه شاطر فى المدرسة وبيسمع كلامها
.. لا هيا بتحبه زى ما هو من غير اى شرط او سبب.

بالظبط هو ده حبنا لمصر
والحمدلله ان ربنا خلقنا كده حبنا ليها حب لله فى لله..لانى دايما بحس اننا
لو بنحب مصر عشان شروط أو أسباب فهنا هيبقا فيه مشكلة كبيرة..

بتخنق أوى من كام كلمة
فالحين دايما نقولهم فى المناسبات وفى الاغانى “مصر الحضارة..مصر
العراقة..مصر الفراعنة..مصر الناس الطيبة..مصر الرجالة الجدعة..وارفع راسك
فوووووووق انت مصرى” وبستغرب لانى بحس دايما ان العراقة والحضارة دى احنا
استغلناها على الجاهز وجبنا بيها سياحة .. والناس الطيبة والرجالة الجدعة
مبقوش كده اوى والفترة الاخيرة تشهد .. لما بنبقا فى مكان مفهوش كراسى
مباشوفش راجل بيقوم عشان ست او حتى عشان حد كبير فى السن ولما شوفت ادامى
واحده شنطتتها بتتسرق ماشوفتش راجل واحد فى الشارع اتهز .. طبعا مقدرش اعمم
ولا اقول ان كل الرجالة او الناس اللى فى مصر بقت كده لإن اللجان الشعبية
كانت أكبر دليل أن الرجالة فى مصر فعلا رجااااالة بس ليه مبنظهرش ومبنتجمعش
الا فى وقت الأزمات؟ ليه منبقاش كده طول الوقت؟!!

نفسى بدل ما نقول مصر حضارة
مش عارفة كام سنة نقول مصر الناس بتجيلها من كل مكان عشان تتعالج..مصر أنضف
شوراع..مصر اكتر مرور منظم..مصر بلد تمشى فى شوارعها متسمعش صوت
كلاكسات..حتى الناس صوتها واطى متسمعوش وبتتعامل مع بعض برقى..متسمعش واحد
معلى صوت الموبايل الصينى وتحس ان ودنك هتتخرم من الاغنية اللى شغالة..ولو
فكرت ألبس ترينيج وأنزل اجرى ساعة ملاقيش الناس بتبحلق فيا..وحاجات
كتيييييييييير كلنا عارفينها سردها مش مشكلة على أد ما المشكلة هنخلص من
الحاجات دى ازاى؟؟

المشكلة طبعا مش فى “مصر”
كبلد..المشكلة فى الناس..طيب ازاى الناس تتغير..هنقول كل واحد يحاول يغير
فى نفسة ونطلع كام اعلان يقولوا “ابدأ بنفسك” “مترميش ورقة فى الشارع”
وكلام من اللى لا يودى ولا يجيب..وبرده مش نافع كل واحد بيقول يعنى هو انا
لما مارميش زبالة هتفرق ما كله بيعمل زيى والورقة اللى رميتها مش هيا اللى
هتفرق(كمثال)..طب ايه الحل؟؟ الحل فى رأيى ممكن ناس تتفق معايا فيه وممكن
ناس متحبوش..انا شايفة الحل هيكون فى سن قوانين قمة فى الصرامة والقسوة
سواء كانت بفرض غرامات مادية او عقوبات بالسجن ويتم تفعيلها ويبقا فى رقابة
على هل يتم تطبيق القاونين ولا لا وهل تتم العقوبات ولا لا وفى حالة وجود
قصور يعاقب المسئول عقاب اقصى و أشد من الشخص اللى خرق القانون والقوانين
توضع فى كل مجالات الحياه فى مصر ابتداءا بالتعليم والصحة والمرور..وهكذا.
وطبعا الناس مع الوقت هتتخنق من القوانين بس هتبقا مجبورة على التصرف بشكل
حضارى خوفا من العقاب والقانون وشوية شوية الناس هتبدأ تفهم معنى انها تعيش
فى رقى وهنتعود على التصرف الكويس وهنعرف قيمته حتى لو بالعافية..أى حد
بيسافر بره بيحترم القانون وبيمشى زى الألف يعنى بتعرف تطبق القانون اهو
يبقا طبقو جوه بلدك أحسن حتى لو غصب عنك.

بالنسبة للتعليم مثلا..انا
بشوف ان المشكلة بسيطة وهتخلص مثلا فى وجود اجهزة الامضاء اللى ببصمة اليد
ووضع كاميرات فى كل فصل دراسى..كتير هيقولوا ده اختراق لحرية المدرس..بس
حرية ايه انت بتشتغل ومفترض ان شغلك يكون بمستوى معين وبعيدن حرية ايه هو
انت اعد فى بيتكم انت فى شغلك..مش قادرة اقولك النتيجة ممكن تكون ايه لما
اعرف ان الدقيقة هتفرق معايا وانى وانا جوه الفصل متراقبة وممكن يكون
بيتسجلى بالظبط كأن موجه اعد معاك جوه الفصل ياسلااااام بتلاقى المدرس فى
اللحظة دى فى قمة ابداعه طب ده انت لما تقوله ان الموجه لما هيجى المدرسة
هياخد تسجيل من تسجيلاتك وهيشوفها وهيقيمك على الاساس ده هتلاقى نفسك
بتشتغل كل يوم كأن عندك سياده الموجه واكيد الموجه هيكون مدرب على الكلام
ده وفاهم معايير التقييم العادلة..وهكذا

نفسى
أحب مصر عشان اسباب عملية لما تسألنى بتحبى مصر ليه؟؟ اقوله بحبها عشان 1)
…… 2) …. 3)….. مش تبقا اجابتى فاضية وانا بقولك بحبها عشان هيا مصر وانا
مصرية وشربت من نبت الأرض الخضرة واتربيت فى شوارعها وحواريها وبيتك البسيط
يتحول قصر..يبقا انت اكيد اكيد فى مصر.

بقلم/ سلمى المنصورى
لا تنسوا التقيم يا اميرات لو بتحبوا مصر