طريقة عمل الريزو

16.05.11 1:21

طريقة عمل الريزو ( رز بالفراخ)

بصي ياستي:
1- اما تجيبي فراخ صدور جاهزة او بالفرخه كامله
عادي اللي تحبيه المهم هتقطعي الفراخ قطع متوسطه (لاكبيرة اوي ولا صغيرة اوي)
عشان كمان يبقي المنظر العام الحلو
المهم بعد تنظيفها كويس (بالملح والدقيق واللمون )
عشان ريحتها تبقي حلوة ونظيفه كده تسبيها حبه تتصفي

2- هاتي الحلة وحطي فيها معلقه زيت بس مش كبيرة اوي ومعلقه حلوة كده من زبده او سمنة زي ما تحبي وتنزلي عليهم 3 معالق سكر كبار (اه سكر متخفيش) وقلبي ومتسيبهاش عشان السكر ميتحرقش منك لحد ما السكر تلاقيه داب
و اللون يبقي بني فاتح ( بكرر فاتح مش غامق اوي) وبعدها تسقطي علي طول الفراخ القطع اللي انتي نظفتيها وقطعتيها وسيباها تصفي

3- اسقطي بعدها كوبايه مياه مليانه ولو لاقيتي محتاجه مايه زودي متخفيش

4- نزلي ( الملح - الفلفل - بهار مشكل - معلقه قرفه كبيرة من معالق الاكل - كاري )

5- قلبي سبيها شويه وروحي هاتي الرز اغسيله كويس وبعدين اسقطيه علي الفراخ وظبطي عقد الرز بتاعك

6- وتابعي بقي كل شويه ( مش تسبيه وتجري وتروحي تتفرجي علي المسلسل)
7- ويسلام بقي لو شويه مكسرات ( لوز - صنوبر )
بس خلاص لحد ما الاكل يستوي وبالهنا والشفا ويلا كده كفايه عشان جعت

ملحوظه هامة :
1- خدي بالك من السكر عشان ميتحرقش واوعي اللون يغمق اوي عشان الاكله متبوظش
لان الخطوة دي اهم حاجه في الاكل كله
2- الاكله مش هتاخد منك كتير
واللي تجرب تقولي حلو وحش تعرفني ويارب تطلع حلوة وتعجبكم والا هيبقي شكلي وحش اوي