طريقه عمل بيتزا تجنن من صنع ايديا وبالصور

بسم الله الرحمن الرحيم

انا الايام دى حاسه انى نشيطه شويتين عشان كدا انا شغاله في المطبخ شويه
بس والله انا هقلكم علي طريقه بيتزا انا عملاها انهارده بالصور بس بجد هتدعولى
المهم تمشوا بالخطوات مظبوطه زى ما انا عملاها بالظبط
وهتبقي ان شاء الله زى اللي بتباع في المطاعم

بصوا بقا وركزوا كويس اوى
اول حاجه مكونات العجينه

نصف كيلو دقيق
معلقه كبيره خميرة
معلقه كبيره سكر
5 معالق كبار زيت
بيضه
شويه ملح صغيرين حوالى نصف معلقه
لبن دافئ للعجن


الطريقه

1- نضع الخميرة علي السكر ونضع القليل من الماء ونذوبهم مع بعض ونتركهم 5 دقائق
2- نضع الدقيق وعليه الملح ثم الخميره والبيضه والزيت وممكن اضافه معلقه سمن (تبع الرغبه ) ثم نعجن العجينه ونقسمها نصفين





ونتركها في مكان دافئ حتى تتخمر لمده نصف ساعه


3- ناتى لتحضير حشوه البيتزا وتتكون من زيتون اسود مقطع _ زيتون اخضر مقطع _ طماطم مقطعه _ فلفل اخضر والوان مقطع _ بصل مقطع شرائح رفيعه جدا يعطى نكهة رائعه _ جبن رومى ويفضل جبن موزاريلا بس انا استخدمت جبنه رومى _ صلصه ولو عندك كتاتشب اخلطيه مع الصلصه بيبقي رائع


4- وبعد كدا ناخد نجيب صينيه وندهنها ماده دهنيه ثم ناخد نصف العجينه ونفرده ونضع شويه جبنه رومى ثم ناخد النصف التانى ونفرده فوقهم بالشكل دا ونبطط العجينه كويس ونقفلها من الاطراف ونجيب شوكه ونخرم العجينه كتير ودا ضرورى وسر النجاح


5_نضع الصلصه ثم نضع طبقه جبنه رومى ثم الزيتون ونضع طماطم ثم البصل والفلفل ثم نضع جبنه علي الوش
تانى





وندخلها الفرن وتهدى النار عشان تستوى من جوا وبعد اما تستوى تحمريها عشان تاخد لون حلو من الوش
ودى شكلها بعد اما طلعت من الفرن




ودا شكلها قبل ما اكلها


ايه رايكوا بقا انا عايزة ردود ولازم تجربوها بجد
انا الايام دى مظبطاكم اكلات حصريه من صنع ايديا يعنى عايزة تقييم حلو
مستنياكم

ههههههههههه قبل ما ارد قيمت طبعا شغلك عاللي اوى يا رورو بجد مواضيع جامده جدا تسلمي يا رب وبجد باين عليكي ست بيت جامده جدا يارب يهنى جوزك بيكي يا رب جامده البيتزا ديه وهجربها ان شاء الله الولاد عندي هيدعولك

كليوباترا كتب:ههههههههههه قبل ما ارد قيمت طبعا شغلك عاللي اوى يا رورو بجد مواضيع جامده جدا تسلمي يا رب وبجد باين عليكي ست بيت جامده جدا يارب يهنى جوزك بيكي يا رب جامده البيتزا ديه وهجربها ان شاء الله الولاد عندي هيدعولك

تسلميلي يا كوكي بجد متشكره اوي وبالهنا والشفا يا حبيبتي

جاااااااااااااااااااااااامدة اوي ونفسي اجربها يا روان
بس هسال سؤال طبقتين العجينة الي انتي حطتيهم فوق بعض كدة متبقاش تخينة اوي اصل انا اول مرة اشوف الطريقة دي انهم يحطو طبقتين فوق بعض

روووووووووووووووووعة
تسلم الايادي يا قمر

عيون القلب كتب:جاااااااااااااااااااااااامدة اوي ونفسي اجربها يا روان
بس هسال سؤال طبقتين العجينة الي انتي حطتيهم فوق بعض كدة متبقاش تخينة اوي اصل انا اول مرة اشوف الطريقة دي انهم يحطو طبقتين فوق بعض

لا انتي تعملي الطبقه الاولي رفيعه وتحطي الجبنه بس مش كتير ترشيها جبنه وانتي بتحطي الطبقه التانيه رفيعه برده تضغطيها وتحطيهم كويس فوق بعض بس متتغطيش اوي علشان الهو مش يخرج من العجينه 

ريحانة الدار كتب:روووووووووووووووووعة
تسلم الايادي يا قمر

تسلمي منوره يا قمر

يا باشا يا باشا على الحركات الجامد انا كمان بعملها حلوه قوى كنت بعملها على طول قبل ما اتجوز مكنوش يحبوا غير اللى بعملها بس انا كنت بحط زبادى لو عيزاها طريه ولو عيزاها كريسبى حطى شويه السكر
وحلوه فكره الطبقتين ولو كنتى حطيتى الموزاريلا كانت هتشد معاكى زى اللى بره تسلم ايدك يا رورو متأكده انها طعمها يجنن
وطبعا تم التقيم

a.l.y.a.a كتب:يا باشا يا باشا على الحركات الجامد انا كمان بعملها حلوه قوى كنت بعملها على طول قبل ما اتجوز مكنوش يحبوا غير اللى بعملها بس انا كنت بحط زبادى لو عيزاها طريه ولو عيزاها كريسبى حطى شويه السكر
وحلوه فكره الطبقتين ولو كنتى حطيتى الموزاريلا كانت هتشد معاكى زى اللى بره تسلم ايدك يا رورو متأكده انها طعمها يجنن
وطبعا تم التقيم

اها فعلا الموزيريلا تجنن بس مكنش عندي ساعتها فالمتاح كان الرومي

تسلمي ياقمر باين عليه طيبة كثير بلهنا عليكي